திருச்செந்தூர் முருகன் கோயில் மாசித் திருவிழா: கொடியேற்றத்துடன் கோலாகலமாகத் தொடக்கம்!

பின்னர் கொடிமரத்திற்குச் சிறப்பு அபிஷேகம் மற்றும் அலங்காரங்கள் செய்யப்பட்டு, காலை 6.35 மணிக்கு மகா தீபாராதனை நடைபெற்றது. இதில் திரளான பக்தர்கள் கலந்துகொண்டு "வெற்றிவேல் முருகனுக்கு அரோகரா" என முழக்கமிட்டு சுவாமி தரிசனம் செய்தனர்.

இன்று மாலையில் அப்பர் சுவாமிகள் தங்கச் சப்பரத்தில் புறப்பட்டு திருவீதிகளில் உழவாரப்பணி செய்யும் நிகழ்ச்சியும், இரவில் ஸ்ரீ பெலி நாயகர் அஸ்திரத்தேவருடன் தந்தப் பல்லக்கில் ஒன்பது சந்திகளில் திருவீதி உலா வரும் நிகழ்ச்சியும் நடைபெற உள்ளது. முன்னதாக, கொடியேற்றத்தை முன்னிட்டு நேற்று வெள்ளிக்கிழமை மாலை கொடிப்பட்ட வீதி உலா நடைபெற்றது.

திருவிழாவின் முக்கிய நிகழ்வாக வரும் பிப்ரவரி 25-ஆம் தேதி ஐந்தாம் திருவிழாவை முன்னிட்டு, மேலக்கோயிலில் (சிவன் கோயில்) இரவு 7.30 மணிக்கு குடைவரைவாயில் தீபாராதனை நடைபெறுகிறது. பிப்ரவரி 27-ஆம் தேதி ஏழாம் திருவிழாவை முன்னிட்டு, அதிகாலை 5 மணிக்கு அருள்மிகு சண்முகப் பெருமானின் உருகு சட்டசேவையும், காலை 9 மணிக்கு ஆறுமுகப் பெருமான் வெட்டிவேர் சப்பரத்தில் எழுந்தருளி பிள்ளையன்கட்டளை மண்டபத்தை வந்தடையும் நிகழ்வும் நடைபெறும். அன்று மாலை 4.30 மணிக்கு சுவாமி சிவன் அம்சத்தில் தங்கச் சப்பரத்தின் மீது சிவப்பு சாத்தி கோலத்தில் எழுந்தருளி வீதியுலா வந்து பக்தர்களுக்குக் காட்சியளிக்கிறார்.

தொடர்ந்து எட்டாம் திருவிழாவான பிப்ரவரி 28-ஆம் தேதி காலை 5 மணிக்கு சுவாமி பிரம்மா அம்சத்தில் பெரிய வெள்ளிச் சப்பரத்தில் வெள்ளை சாத்தி கோலத்திலும், காலை 10.30 மணிக்கு விஷ்ணு அம்சத்தில் பச்சைக் கடைசல் சப்பரத்தில் பச்சை சாத்தி கோலத்திலும் எழுந்தருளி வீதியுலா வருகிறார். மார்ச் 1-ஆம் தேதி ஒன்பதாம் திருவிழா அன்று இரவு சுவாமி தங்கக் கைலாய பர்வத வாகனத்திலும், அம்மன் வெள்ளிக் கமல வாகனத்திலும் வீதியுலா நடைபெறுகிறது.

விழாவின் சிகர நிகழ்ச்சியான மகா தேரோட்டம் மார்ச் 2-ஆம் தேதி நடைபெறுகிறது. அதனைத் தொடர்ந்து மார்ச் 3-ஆம் தேதி இரவு தெப்ப உற்சவமும், மார்ச் 4-ஆம் தேதி 12-ஆம் திருவிழாவுடன் விழா நிறைவு பெறுகிறது. இதற்கான பாதுகாப்புப் பணிகளில் கோயில் காவல் நிலைய ஆய்வாளர் கனகராஜன் தலைமையிலான காவல்துறையினர் ஈடுபட்டுள்ளனர். விழா ஏற்பாடுகளைத் தக்கார் ரா. அருள்முருகன், இணை ஆணையர் க. ராமு மற்றும் திருக்கோயில் பணியாளர்கள் செய்துள்ளனர்.