உணவகங்கள் மற்றும் டீக்கடைகளுக்கு மின் நுகர்வில் ரூ.2 மானியம்: தமிழக அரசு அதிரடி அறிவிப்பு!

வளைகுடா நாடுகளில் நிலவும் போர்ச் சூழல் காரணமாக ஏற்பட்டுள்ள எரிவாயுதட்டுப்பாட்டைச் சமாளிக்க, உணவகங்கள் மற்றும் சிறு தொழில்களுக்கு மின் நுகர்வில் மானியம் உள்ளிட்ட பல்வேறு சலுகைகளை முதலமைச்சர் மு.க. ஸ்டாலின் அறிவித்துள்ளார்.

எரிவாயு தட்டுப்பாட்டினால் உணவகங்கள், டீக்கடைகள் மற்றும் கிளவுட் கிச்சன் உள்ளிட்ட உணவு உற்பத்தி கூடங்கள் பெரும் பாதிப்புக்குள்ளாகியுள்ளன. இந்தச் சூழலில், அவர்கள் எரிவாயுவிற்குப் பதிலாக மின் அடுப்புகளைப் பயன்படுத்த ஊக்குவிக்கப்படுகிறார்கள். அவ்வாறு பயன்படுத்தும்போது ஏற்படும் கூடுதல் மின் நுகர்வுக்கு, ஒரு யூனிட்டுக்கு ரூ.2 மானியம் வழங்கப்படும் என அரசு அறிவித்துள்ளது. மத்திய அரசு விதித்துள்ள வணிக எரிவாயு கட்டுப்பாடுகள் அமலில் இருக்கும் வரை இந்த மானியம் தொடரும்.

கடந்த பிப்ரவரி 28 அன்று அமெரிக்கா மற்றும் இஸ்ரேல் கூட்டுப்படைகள் ஈரான் மீது போர் தொடுத்தன. இதன் விளைவாக, ஹொர்முஸ் (Hormuz) ஜலசந்தி வழியாக வரும் கப்பல் போக்குவரத்து தடைபட்டு, இந்தியாவிற்கு வரும் கச்சா எண்ணெய் மற்றும் எரிவாயு விநியோகம் பாதிக்கப்பட்டுள்ளது. இந்த இடர்பாடுகளை நீக்கி, தொழில் துறையினருக்கு உதவ முதலமைச்சர் தலைமையில் நடைபெற்ற ஆய்வுக் கூட்டத்தில் இந்த முடிவுகள் எடுக்கப்பட்டுள்ளன.

எரிவாயுவிற்கு மாற்றாக மின் உபகரணங்கள் (Electric Heaters/Induction Stoves) கொள்முதல் செய்யப் பின்வரும் திட்டங்களின் கீழ் நிதியுதவி வழங்கப்படும்:

• UYEGP திட்டம்: 25% மானியம் (அதிகபட்சம் ரூ. 3.75 லட்சம்).

• மகளிர் தொழில் முனைவோர் திட்டம்: 25% மானியம் (ரூ. 10 லட்சம் வரை கடன்).

• அண்ணல் அம்பேத்கர் திட்டம்: 35% மானியம் (அதிகபட்சம் ரூ. 1 கோடி வரை கடன்).

• சுற்றுச்சூழல் விதிகளில் தளர்வு

எல்.பி.ஜி (LPG) மற்றும் சி.என்.ஜி (CNG) எரிபொருட்களுக்கு மாற்றாக மண்ணெண்ணெய், பயோமாஸ் (Biomass) போன்றவற்றைத் தொழிற்சாலைகள் பயன்படுத்திக்கொள்ள அனுமதி அளிக்கப்பட்டுள்ளது. இதற்கு மாசுக்கட்டுப்பாட்டு வாரியத்திடம் புதிய இசைவாணை (CTE/CTO) பெறத் தேவையில்லை, தகவல் தெரிவித்தால் போதுமானது.

விவசாயிகள் மற்றும் பால் உற்பத்தியாளர்களுக்குப் பாதுகாப்பு

ஆவின் கொள்முதல்: உணவகங்கள் மூடப்படுவதால் தேக்கமடையும் உபரி பாலை எவ்விதக் கட்டுப்பாடும் இன்றி ஆவின் நிலையங்கள் கொள்முதல் செய்ய உத்தரவிடப்பட்டுள்ளது.

உழவர் சந்தைகள்: காய்கறி மற்றும் பழங்கள் விற்பனை பாதிக்கப்படாமல் இருக்க, தமிழகத்திலுள்ள 194 உழவர் சந்தைகளிலும் விவசாயிகள் தடையின்றி விற்பனை செய்ய அனுமதி வழங்கப்பட்டுள்ளது.

மாநில அளவில் தலைமைச் செயலாளர் தலைமையிலும், மாவட்ட அளவில் ஆட்சியர் தலைமையிலும் எரிவாயு விநியோகத்தைக் கண்காணிக்கக் குழுக்கள் அமைக்கப்பட்டுள்ளன.   குடும்ப அட்டைதாரர்களுக்கு இந்த மாதம் கூடுதலாக 3,228 கிலோ லிட்டர் மண்ணெண்ணெய் வழங்கவும் முதலமைச்சர் ஆணையிட்டுள்ளார்.