தவெக பொதுக்கூட்டத்தில் மின்வாரிய உயர் அதிகாரிகள் : அரசியல் வட்டாரத்தில் பரபரப்பு!

தூத்துக்குடியில் அமைச்சர் நிர்மல் குமார் பங்கேற்ற தவெக பொதுக்கூட்டத்தில் மின்வாரிய உயர் அதிகாரிகள் பலர் நேரில் கலந்துகொண்டது பெரும் சர்ச்சையை ஏற்படுத்தியுள்ளது.

தூத்துக்குடி சிதம்பர நகர் பேருந்து நிறுத்தத்தில் தமிழக வெற்றிக் கழகத்தின் மத்திய மாவட்டக் கழகம் சார்பில் நலத்திட்ட உதவிகள் வழங்கும் விழா மற்றும் பொதுக்கூட்டம் நடைபெற்றது. இந்நிகழ்ச்சிக்குத் தவெக மத்திய மாவட்டச் செயலாளர் எஸ்.டி.ஆர். சாமுவேல் ராஜ் தலைமை தாங்கினார்.கூட்டத்தில் எரிசக்தி மற்றும் சட்டத்துறை அமைச்சர் நிர்மல் குமார் கலந்துகொண்டு, பொதுமக்களுக்கு நலத்திட்ட உதவிகளை வழங்கிச் சிறப்புரையாற்றினார்.

பொதுவாக அரசியல் கட்சிகளின் பொதுக்கூட்டங்களில் கிராம நிர்வாக அலுவலர் அல்லது வருவாய் ஆய்வாளர் போன்ற களப்பணியாளர்கள் பாதுகாப்பு மற்றும் கண்காணிப்புப் பணிகளுக்காகக் கலந்துகொள்வது மட்டுமே நடைமுறையாக இருந்து வருகிறது. இதுவரை தமிழகத்தில் ஆட்சி செய்த எந்தவொரு அரசியல் கட்சியின் பொதுக்கூட்டத்திலும் அரசுத் துறைகளின் உயர் அதிகாரிகள் கலந்துகொண்டதில்லை.

இந்நிலையில், அமைச்சர் நிர்மல் குமார் பங்கேற்ற தவெக பொதுக்கூட்டத்தில் மின்வாரிய உயர் அதிகாரிகள் பலர் நேரில் கலந்துகொண்டது பொதுமக்கள் மற்றும் அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது. குறிப்பாக, மின்வாரிய நகர மற்றும் ஊரகப் பகுதி செயற்பொறியாளர்கள் தங்களுக்கு அரசு ஒதுக்கிய அதிகாரப்பூர்வ கார்களில் அமர்ந்திருந்ததும், ஒருசில அதிகாரிகள் மேடையின் முன்புறம் நின்று கொண்டிருந்ததும் தெரியவந்துள்ளது.

அரசியல் கட்சியின் பொதுக்கூட்டத்தில் முதன்முறையாக மின்வாரிய உயர் அதிகாரிகள் இப்படிப் பட்டவர்த்தனமாகப் பங்கேற்றது ஏன் என்ற கேள்வி எழுந்துள்ள நிலையில், இச்சம்பவம் தற்போதைய அரசியல் வட்டாரத்தில் பெரும் விவாதத்தையும் பரபரப்பையும் ஏற்படுத்தியுள்ளது.