அஸ்வின் அபாரம்: இந்திய அணி இன்னிங்ஸ் வெற்றி!

மேற்கிந்தியத் தீவுகள் அணிக்கு எதிரான முதல் டெஸ்ட் போட்டியில் 141 ரன்கள் மற்றும் இன்னிங்ஸ் வெற்றியை இந்தியா பெற்று அசத்தியுள்ளது.

கடந்த 12-ஆம் தேதி தொடங்கிய ஆட்டத்தில் முதலில் பேட் செய்த மேற்கிந்தியத் தீவுகள், 150 ரன்களுக்கே ஆட்டமிழந்தது. அலிக் அதனாஸ் 47 ரன்கள் அடித்ததே அதிகபட்சமாக இருக்க, இந்திய தரப்பில் அஸ்வின் 5 விக்கெட், ஜடேஜா 3 விக்கெட் சரித்தனா். பின்னா் இன்னிங்ஸை தொடங்கிய இந்தியாவில் ஜெய்ஸ்வால் - ரோஹித் கூட்டணி அபாரமாக ரன்கள் சோ்த்தது. முதல் விக்கெட்டுக்கு 229 ரன்கள் குவித்த நிலையில் இந்த பாா்ட்னா்ஷிப் பிரிந்தது.

ரோஹித் 10 பவுண்டரிகள், 2 சிக்ஸா்கள் உள்பட 103 ரன்களுக்கு ஆட்டமிழந்தாா். தொடா்ந்து வந்த ஷுப்மன் கில் 6 ரன்களுக்கே நடையைக் கட்டினாா். அறிமுக டெஸ்டில் அசத்திய ஜெய்ஸ்வால் 387 பந்துகளுக்கு 171 ரன்கள் குவித்து ஆட்டமிழந்தார். ரஹானே 3 ரன்களுக்கு ஆட்டமிழக்க, விராட் கோலியும் ஜடேஜாவும் பொறுமையாக விளையாடினர். 76 ரன்களுக்கு கோலி அவுட்டாக இந்திய அணி 421 ரன்கள் பெற்ற நிலையில் டிக்ளேர் செய்தது.

ஜடேஜா 76, இஷான் கிஷன் 1 ரன்களுடன் ஆட்டமிழக்காமல் இருந்தனர்.272 ரன்கள் இலக்குடன் களமிறங்கிய மேற்கிந்தியத் தீவுகள் அணியின் பேட்டர்கள் ஒவ்வொருவராக வந்த வேகத்தில் நடையை கட்டினர். 50.3 ஓவர்களில் அனைத்து விக்கெட்டையும் இழந்து 130 ரன்கள் மட்டுமே எடுத்தனர். அஸ்வின் 7, ஜடேஜா 2, சிராஜ் 1 விக்கெட்டுகளை எடுத்தனர். ஒரு இன்னிங்ஸ் பேட்டிங் செய்யாத நிலையில், 130 ரன்கள் வித்தியாசத்தில் வெற்றி பெற்றது இந்திய அணி. 1-0 என்ற கணக்கில் முன்னிலை பெற்றுள்ளது. முதல் இன்னிங்ஸில் 5, இரண்டாவது இன்னிங்ஸில் 7 என மொத்தம் 12 விக்கெட்டுகளை அஸ்வின் சாய்த்துள்ளார்.