2040-ல் காதல் எப்படி இருக்கும்? – லவ் இன்சூரன்ஸ் கம்பெனி விமர்சனம்!

» சினிமா » திரை விமர்சனம்

2040-ல் காதல் எப்படி இருக்கும்? – லவ் இன்சூரன்ஸ் கம்பெனி விமர்சனம்!

புதன் 15, ஏப்ரல் 2026 5:26:24 PM (IST)

கிட்டத்தட்ட 4 வருட இடைவெளிக்குப் பிறகு விக்னேஷ் சிவன் இயக்கியிருக்கும் திரைப்படம். 'ஜென்-ஸி' (Gen-Z) தலைமுறையின் ஆதர்ச நாயகனாக வளர்ந்துள்ள பிரதீப் ரங்கநாதன், அனிருத் இசை எனப் பெரும் எதிர்பார்ப்புகளுக்கு மத்தியில் வெளியாகியிருக்கும் இந்த 'சயின்ஸ் ஃபிக்ஷன்' காதல் கதை எப்படி இருக்கிறது?

படத்தின் கதை 2040-ஆம் ஆண்டு சென்னையில் நடக்கிறது. மனிதர்களின் காதலைத் தீர்மானிக்கும் ஒரு மொபைல் செயலிதான் (App) படத்தின் மையக்கரு. 'கமிட்மென்ட்', 'பிரேக் அப்', 'காதலின் அளவு' என அனைத்தையும் வரையறுக்கும் அந்தச் செயலியை உருவாக்கிப் பெரும் பணக்காரராக இருக்கிறார் சூரியன் (எஸ்.ஜே.சூர்யா).

இன்னொரு பக்கம், தொழில்நுட்ப வாடையே இல்லாமல் இயற்கையோடு வாழ்ந்து வரும் அன்புக் கடலின் (சீமான்) மகன் 'வைப்' வாஸி (பிரதீப் ரங்கநாதன்). சிறுவயது முதல் தாயின் அரவணைப்பு இன்றி, செல்போனுக்கு அடிமையாகி வளரும் தீமா (கீர்த்தி ஷெட்டி) மீது நாயகனுக்குக் காதல் மலர்கிறது. தொழில்நுட்பத்திற்குப் பழக்கப்படாத நாயகன், காதலிக்காகப் புதிய போன் வாங்கி 'LiK' செயலியைப் பதிவிறக்கம் செய்கிறார்.

ஒரு கட்டத்தில், காதலின் அளவைத் துல்லியமாகக் காட்டும் புதிய 'அப்டேட்' ஒன்றை சூரியன் அறிமுகம் செய்கிறார். அந்தச் செயலி கொடுக்கும் தரவுகளால் (Data) நாயகனிடமிருந்து நாயகி விலகிச் செல்கிறார். இதன் பிறகு காதலர்கள் இணைந்தார்களா? தொழில்நுட்பம் காதலை வென்றதா? என்பதே மீதிக் கதை.

படம் தொடங்கியவுடனேயே 2040-ன் சென்னையை ஒரு நவீன தொழில்நுட்ப நகரமாகக் கண்முன் நிறுத்தியுள்ளார் இயக்குநர் விக்னேஷ் சிவன். வானளாவிய கட்டிடங்கள், ஹாலோகிராஃபிக் விளம்பரப் பலகைகள், பறக்கும் கார்கள் என ஒரு ஹாலிவுட் தரத்திலான மெகா சிட்டியை உருவாக்கியிருப்பது சிறப்பு.

எதிர்காலக் குறியீடுகளாகப் படத்தில் வரும் ‘தலைவர் 189’, ‘மிஷன் இம்பாசிபிள் 14’, விஜய் மகன் இயக்கத்தில் அஜித் மகன் நடிக்கும் ‘பத்ரி 2’ போன்ற நுணுக்கமான பகடிகள் தியேட்டரில் சிரிப்பலைகளை ஏற்படுத்துகின்றன. பரங்கிமலையில் வைக்கப்பட்டிருக்கும் 'கோலிவுட்' சின்னம், ஸ்மார்ட் குடை விற்கும் அமெரிக்க இளைஞர் எனப் பல சுவாரசியமான விஷயங்கள் படம் முழுக்கத் தூவப்பட்டுள்ளன.

பிரதீப் ரங்கநாதன்: தனது வழக்கமான சேட்டையான மேனரிசங்களால் ஈர்க்கிறார். உணர்வுபூர்வமான காட்சிகளுக்கான வாய்ப்பு குறைவாக இருந்தாலும், படத்தை இறுதிவரை தாங்கிப் பிடிக்கிறார்.

சீமான்: தொழில்நுட்பத்தை வெறுக்கும் பாத்திரத்தில் சிறப்பான நடிப்பைத் தந்துள்ளார். அவரது பின்னணி நியாயம் சேர்க்கிறது.

கீர்த்தி ஷெட்டி: அழகுப் பதுமையாக வந்து செல்கிறார். ஆனால், பல இடங்களில் நடிப்பு செயற்கையாகத் தெரிகிறது.

தொழில்நுட்பக் கலைஞர்கள்: அனிருத்தின் இசை படத்தின் மிகப்பெரிய பலம். குறிப்பாக, படத்தில் வரும் ரோபோவுக்கு அவர் குரல் கொடுத்திருப்பது சுவாரஸ்யம். ரவி வர்மனின் ஒளிப்பதிவு மற்றும் கலை இயக்குநரின் உழைப்பு ஒரு புதிய உலகத்தையே நம் கண்முன் நிறுத்துகிறது.

கலர்ஃபுல்லான மேக்கிங், துள்ளலான இசை எனப் பல பாசிட்டிவ் அம்சங்கள் இருந்தாலும், திரைக்கதையில் ஆழம் இல்லாதது பலவீனமாகத் தெரிகிறது. கதாபாத்திரங்களுக்கு இடையிலான உறவுகள் மேம்போக்காகவே எழுதப்பட்டுள்ளன. குறிப்பாகத் தாய் - மகள் இடையிலான உணர்வுபூர்வமான காட்சிகள் எந்தத் தாக்கத்தையும் ஏற்படுத்தவில்லை.

நெட்பிளிக்ஸில் வெளியான ‘பிளாக் மிரர்’ (Black Mirror) போன்ற தீவிரத்தன்மை இல்லாவிட்டாலும், ஜாலியான பொழுதுபோக்குத் திரைப்படமாக இது கவனிக்க வைக்கிறது.

தொழில்நுட்பத்தால் இயங்கும் ரோபோக்களால் ஒருபோதும் மனித இதயத்தின் உண்மையான தேடலையும், அன்பையும் ஈடு செய்ய முடியாது என்பதைப் படம் வலியுறுத்துகிறது. வார இறுதியில் குடும்பத்துடன் ஒரு ஜாலியான 'ஃபுயூச்சரிஸ்டிக்' திரைப்படத்தைப் பார்க்க விரும்புபவர்கள் தாராளமாக 'லவ் இன்சூரன்ஸ் கம்பெனி'க்கு டிக்கெட் எடுக்கலாம்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

2040-ல் காதல் எப்படி இருக்கும்? – லவ் இன்சூரன்ஸ் கம்பெனி விமர்சனம்!

» சினிமா » திரை விமர்சனம்