அமெரிக்காவில் கப்பல் மோதி விபத்து: பாலம் இடிந்து விழுந்தது!

அமெரிக்காவின் மேரிலேண்ட் மாகாணத்தில் உள்ள பால்டிமோர் பாலத்தில் கப்பல் மோதியதில் பாலம் இடிந்து விழுந்த சம்பவம் பரபரப்பை  ஏற்படுத்தியுள்ளது.

அமெரிக்காவில் பால்டிமோர் பகுதியில் பிரான்சிஸ் ஸ்காட் என்ற மிகப்பெரிய பாலம் ஒன்று அமைந்துள்ளது. இன்று காலை இந்த பாலத்தின் மீது பெரிய சரக்கு கப்பல் ஒன்று திடீரென மோதி விபத்துக்குள்ளானது. சிங்கப்பூர் கொடியுடன் கூடிய டாலி என்ற பெயரிலான சரக்கு கப்பல் பால்டிமோர் வழியாக இலங்கையின் கொழும்பு நகருக்குச் சென்று கொண்டிருந்ததாக கடலோர காவல் படை தெரிவித்துள்ளது.

இந்த விபத்தில், 2.6 கி.மீட்டர் நீளம் கொண்ட பாலத்தின் ஒருபகுதி இடிந்து விழுந்தது. இதனால் பாலத்தில் போக்குவரத்து நிறுத்தப்பட்டுள்ளது. பாலத்தின் மீது மோதிய வேகத்தில் கப்பல் தீப்பிடித்து நீரில் மூழ்கியுள்ளது. பாலம் இடிந்து விழுந்ததில் 10 பேர் ஆற்றில் விழுந்ததாக முதற்கட்ட தகவல்கள் தெரிவிக்கின்றன. பாஷ்மோர் நகரத் தீயணைப்புத் துறையினர் ஆற்றில் விழுந்தவர்களை மீட்கும் பணியில் ஈடுபட்டுள்ளனர்.