வடகொரியத் தேர்தலில் கிம் ஜாங் உன் வெற்றி: 0.07% எதிர்ப்பு வாக்குகளால் பரபரப்பு!

வடகொரியத் தேர்தலில் கிம் ஜாங் உன் போன்ற மகத்தான வெற்றி பெற்றுள்ள நிலையில், அவருக்கு எதிரான 0.07% எதிர்ப்பு வாக்குகள் இணையத்தில் விவாதங்களை உருவாக்கியுள்ளன.

வடகொரியாவில் கடந்த மார்ச் 15-ஆம் தேதி நடைபெற்ற நாடாளுமன்றத் தேர்தலில் (15-வது உச்ச மக்கள் பேரவை), அதிபர் கிம் ஜாங் உன் தலைமையிலான கொரியத் தொழிலாளர் கட்சி மற்றும் அதன் கூட்டணிக் கட்சிகள் 99.93% வாக்குகளைப் பெற்று அனைத்து இடங்களையும் கைப்பற்றியுள்ளன.

வடகொரிய அரசு ஊடகமான KCNA வெளியிட்டுள்ள அதிகாரப்பூர்வ புள்ளிவிவரங்களின்படி:

வாக்குப்பதிவு: 99.99% (பதிவு செய்யப்பட்ட வாக்காளர்களில்).

ஆதரவு வாக்குகள்: 99.93%.

எதிர்ப்பு வாக்குகள்: 0.07%.

வாக்களிக்காதவர்கள்: 0.0037% பேர் வெளிநாட்டில் அல்லது கடலில் பணியில் இருந்ததால் வாக்களிக்கவில்லை; 0.00003% பேர் மட்டுமே வாக்களிக்கத் தவறியுள்ளனர்.

வரலாற்று மாற்றம்: வழக்கமாக 100% ஆதரவு வாக்குகளை மட்டுமே அறிவிக்கும் வடகொரியா, 1957-ஆம் ஆண்டுக்குப் பிறகு முதல்முறையாக 0.07% எதிர்ப்பு வாக்குகள் பதிவாகியுள்ளதை ஒப்புக்கொண்டுள்ளது. இது சர்வதேச அளவில் அரசியல் நோக்கர்களிடையே பெரும் ஆச்சரியத்தை ஏற்படுத்தியுள்ளது. வடகொரியத் தேர்தல் முறையில் ஒரே ஒரு வேட்பாளர் மட்டுமே களத்தில் இருப்பார் என்பதால், இது ஒரு "காட்சித் தேர்தல்" (Show Election) என விமர்சிக்கப்பட்டாலும், எதிர்ப்பு வாக்குகளை அரசு ஏற்றுக்கொண்டது ஒரு முக்கியமான மாற்றமாகக் கருதப்படுகிறது.

687 பிரதிநிதிகள் தேர்ந்தெடுக்கப்பட்ட இந்தத் தேர்தலில், கிம் ஜாங் உன்னின் சகோதரி கிம் யோ ஜோங், கல்லிம்கில் (தொகுதி எண்: 5) வெற்றி பெற்று மீண்டும் தனது செல்வாக்கை உறுதி செய்துள்ளார்.

இணையத்தில் வைரலாகும் 0.07%: வடகொரியாவில் இது போன்ற மகத்தான வெற்றிகள் சாதாரணமானவை என்றாலும், அந்த 0.07% எதிர்ப்பு வாக்குகள் இணையத்தில் கிண்டலான விவாதங்களை உருவாக்கியுள்ளன:

"அந்த 0.07% பேருக்காக ஒரு நிமிடம் மௌன அஞ்சலி செலுத்துவோம்" என ஒருவர் பதிவிட்டுள்ளார்.

"அந்த 0.07% பேரின் பெயர்களை உடனே வெளியிடுங்கள் - கிம் ஜாங் உன்" என்பது போன்ற மீம்ஸ்கள் (Memes) வைரலாகி வருகின்றன.

"இந்தக் கோடை காலத்தில் வடகொரியாவின் மக்கள் தொகை 0.07% குறைய வாய்ப்புள்ளது" என நெட்டிசன்கள் கிண்டலாகக் கருத்துத் தெரிவித்து வருகின்றனர்.