ரஷ்யாவில் பயங்கரம்: மலைச்சரிவில் மோதி ராணுவ விமானம் விபத்து – 29 பேர் உடல் சிதறி பலி!

ரஷ்யாவில் ராணுவத்திற்குச் சொந்தமான போக்குவரத்து விமானம் மலைச்சரிவில் மோதி விபத்துக்குள்ளானதில், அதில் பயணித்த வீரர்கள் உட்பட 29 பேர் பரிதாபமாக உயிரிழந்தனர்.

ரஷ்யா மற்றும் உக்ரைன் நாடுகளுக்கு இடையே போர் தீவிரமடைந்துள்ள நிலையில், ரஷ்ய ராணுவத்தின் ‘ஏ.என்.-26’ (An-26) ரகத்தைச் சேர்ந்த இரட்டை எஞ்சின் போக்குவரத்து விமானம், கிரிமியா தீபகற்பத்தின் வான்பரப்பில் வழக்கமான ரோந்து மற்றும் போக்குவரத்துப் பணியில் ஈடுபட்டிருந்தது. அப்போது, கட்டுப்பாட்டு அறையுடனான தொடர்பை அந்த விமானம் திடீரென இழந்தது. இதனால் அதிர்ச்சியடைந்த ராணுவ அதிகாரிகள், உடனடியாகத் தேடுதல் பணியில் இறங்கினர்.

நள்ளிரவில் நடத்தப்பட்ட தீவிரத் தேடுதலில், அந்த விமானம் ஒரு செங்குத்தான மலைச்சரிவில் மோதி உருக்குலைந்து கிடப்பது கண்டுபிடிக்கப்பட்டது. இந்த கோர விபத்தில் விமானத்தில் இருந்த 6 ஊழியர்கள் மற்றும் 23 பயணிகள் என மொத்தம் 29 பேரும் சம்பவ இடத்திலேயே உடல் சிதறி பலியாகினர்.

விபத்து நடந்த இடம் அடர்ந்த மலைப்பகுதி என்பதால், பலியானவர்களின் உடல்களை மீட்பதில் மீட்புப் படையினருக்கும் ராணுவ வீரர்களுக்கும் பெரும் சிரமம் ஏற்பட்டுள்ளதாகத் தகவல்கள் தெரிவிக்கின்றன.

இந்த விபத்து குறித்து ரஷ்யப் பாதுகாப்பு அமைச்சகம் வெளியிட்டுள்ள முதற்கட்ட அறிக்கையில்: "தொழில்நுட்பக் கோளாறு காரணமாகவே இந்தத் துயரம் நிகழ்ந்திருக்கலாம். இதில் வெளிநபர்களின் தாக்குதலோ அல்லது ஏவுகணை வீச்சு போன்ற நாசவேலைகளோ நடைபெறவில்லை" என்று உறுதிபடத் தெரிவித்துள்ளது. இருப்பினும், விபத்து குறித்து உயர்மட்ட விசாரணைக்கு உத்தரவிடப்பட்டுள்ளது.

விபத்துக்குள்ளான ‘ஏ.என்.-26’ ரக விமானங்கள் சோவியத் யூனியன் காலத்தில் வடிவமைக்கப்பட்டவை. இவை நீண்டகாலமாக ரஷ்ய ராணுவத்தில் சரக்குகள் மற்றும் வீரர்களை ஏற்றிச் செல்லப் பயன்படுத்தப்பட்டு வருகின்றன.

கடந்த 2014-ஆம் ஆண்டு உக்ரைனிடமிருந்து கிரிமியாவை ரஷ்யா தனது நாட்டுடன் இணைத்துக்கொண்டது முதல், அங்கு பாதுகாப்பு பலப்படுத்தப்பட்டு ராணுவ விமானங்கள் தொடர்ந்து ரோந்து பணியில் ஈடுபட்டு வருகின்றன. போர்ச் சூழலுக்கு இடையே ஒரு ராணுவ விமானம் விபத்துக்குள்ளானது ராணுவ வட்டாரத்தில் பெரும் அதிர்ச்சியை ஏற்படுத்தியுள்ளது.