தேக்கு மரம் கடத்திய 2 பேர் கைது: வன அலுவலர்கள் இருவர் சஸ்பெண்ட்!

தென்காசி அருகே தேக்கு மரங்களை வெட்டி கடத்திய கும்பலோடு தொடர்புடைய 2 பேரை போலீஸார் கைது செய்துள்ளனர். இந்த சம்பவம் தொடர்பாக வன அலுவலர்கள் இருவர் பணியிடை நீக்கம் செய்யப்பட்டுள்ளனர்.

தென்காசி மாவட்டம் குற்றாலம் வனச்சரக எல்கைக்குட்பட்ட புளியரை மேற்குத் தொடர்ச்சி மலையின் பாதுகாக்கப்பட்ட வனப்பகுதியில் அமைந்துள்ளது மோட்டை நீர்தேக்கம். இந்த நீர்த்தேக்க பகுதியை ஒட்டியுள்ள இடங்களில் அதிகளவு தேக்கு மரங்கள் வளர்ந்துள்ளன. பல லட்சக்கணக்கான ரூபாய் மதிப்புள்ள இம்மரங்களை சட்டவிரோதமாக சிலர் வெட்டி கடத்துவதாக வனத்துறையினருக்கு ரகசிய தகவல் கிடைத்தது. 

அதன்பேரில், வன அலுவலர் சீதாராமன் தலைமையிலான வனத்துறையினர், சம்பவ இடத்திற்கு சென்று திடீர் சோதனை நடத்தினர். இந்த சோதனையின்போது, நன்கு வளர்ந்த தேக்கு மரங்களை, மர்மநபர்கள் சட்டத்திற்கு புறம்பாக வெட்டி கடத்துவதற்கு தயார் நிலையில் வைத்திருப்பதை அதிகாரிகள்‌ கண்டுபிடித்தனர். 

இதுகுறித்து விசாரணை நடத்திய வனத்துறையினர், கடத்தல் கும்பலோடு தொடர்புடைய முகமது கனி, பொன்னுத்துரை ஆகிய இருவரை கைது செய்தனர். அவர்களிடம் நடத்திய விசாரணையில், இந்த கடத்தல் சம்பவத்தில் மேலும் சில நபர்களுக்கும், முக்கிய பிரமுகர்களுக்கும் தொடர்பிருப்பது தெரியவந்துள்ளது. அவர்கள் குறித்து விசாரணை நடத்தப்பட்டு வருகிறது. தலைமறைவான மற்றவர்களை பிடிக்கும் பணியிலும் வனத்துறையினர் தீவிரமாக ஈடுபட்டு வருகின்றனர்.