தூத்துக்குடியில் பாதாள சாக்கடைப் பணிகள் தீவிரம் : மேயர் ஜெகன் பெரியசாமி நேரில் ஆய்வு!

தூத்துக்குடி மாநகராட்சிக்குட்பட்ட பல்வேறு வார்டுகளில் விறுவிறுப்பாக நடைபெற்று வரும் பாதாள சாக்கடைப் பணிகளை  மேயர் ஜெகன் பெரியசாமி நேரில் பார்வையிட்டு ஆய்வு மேற்கொண்டார்.

தூத்துக்குடி மாநகராட்சிக்குட்பட்ட 16, 17, 18, 49 மற்றும் 50 ஆகிய வார்டு பகுதிகளில் உள்ள பி&டி காலனி, கதிர்வேல் நகர், சிவஜோதி நகர், விஷ்ணுபுரி, வேலவன் நகர், முத்து கிருஷ்ணா நகர், அசோக் நகர், ராஜிவ் நகர், பாரதி நகர், புஷ்பா நகர், எஸ்பிஎம் நகர், ஹரிராம் நகர், சந்திரேசன் நகர், நிக்லேசன் நகர், காந்தி நகர், கோக்கூர், பால்பாண்டி நகர், அன்னை தெரசா நகர், செல்சீனி காலனி, கோட்ஸ் நகர், அந்தோனியார்புரம், கிருபை நகர், முனியசாமி நகர், என்ஜிஓ (NGO) காலனி, சக்தி நகர், சாந்தி நகர், அமுதா நகர் மற்றும் அருணா நகர் உள்ளிட்ட 28 குடியிருப்புப் பகுதிகளில் இந்த ஆய்வு நடத்தப்பட்டது.

ஆய்வுப் பணியின் போது மேயர் ஜெகன் பெரியசாமி கூறுகையில், "தற்போது இப்பகுதிகளில் பாதாள சாக்கடைக்கான பிரதான குழாய் பதிக்கும் பணிகள், வீடுகளுக்கான இணைப்பு குழாய் அமைக்கும் பணிகள் மற்றும் வீடுகளுக்குள் சேம்பர்  கட்டும் பணிகள் தீவிரமாக நடைபெற்று வருகின்றன.பொதுமக்கள் தங்களின் வீட்டு கழிவுநீர் இணைப்புகளை இப்போதே பாதாள சாக்கடைக் குழாய்களுடன் இணைக்க வேண்டாம். மாநகராட்சி நிர்வாகம் சார்பில் பணிகள் முழுமையாக நிறைவடைந்து அதிகாரப்பூர்வமாக அறிவுறுத்தப்பட்ட பின்னரே, தங்களின் வீட்டு இணைப்புகளை அதனோடு இணைக்க வேண்டும்" எனப் பொதுமக்களுக்குக் கேட்டுக்கொண்டார்.

இந்த ஆய்வின் போது தமிழ்நாடு குடிநீர் வடிகால் வாரிய நிர்வாகப் பொறியாளர் ஆனந்தி, உதவி நிர்வாகப் பொறியாளர் வான்மதி, பகுதிக் கழகச் செயலாளர் ரவீந்திரன், வட்டக் கழகச் செயலாளர்கள் சுரேஷ், பொன் பெருமாள், மாமன்ற உறுப்பினர்கள் இசக்கிராஜா, சந்திர போஸ், கண்ணன் மற்றும் மாநகராட்சி, கழக நிர்வாகிகள் பலர் உடனிருந்தனர்.