உப்பளத் தொழிலைக் காக்கப் போராட்டம் நடத்தினால் தூத்துக்குடி தாங்காது: சுபாஷ் பண்ணையார் எச்சரிக்கை!

உப்பளத் தொழிலாளர்கள் மற்றும் மீனவர்களின் வாழ்வாதாரத்தைப் பாதிக்கும் கப்பல் கட்டும் தளத் திட்டத்தைத் தமிழக அரசு உடனடியாகக் கைவிட வேண்டும் என அகில இந்திய நாடார் பாதுகாப்பு பேரவைச் செயலாளரும் வெங்கடேஷ் பண்ணையார் நற்பணி இயக்க நிறுவனத் தலைவருமான சுபாஷ் பண்ணையார் வலியுறுத்தியுள்ளார்.

தூத்துக்குடி கடற்கரையை ஒட்டியுள்ள முள்ளக்காடு பகுதியில் கோவளம், பசுவந்தனை, தன்பாடு ஆகிய இடங்களில் கடந்த 93 ஆண்டுகளாகச் சிறிய அளவிலான உப்பு உற்பத்தி நடைபெற்று வருகிறது. இத்தொழிலை நம்பி 15 ஆயிரத்திற்கும் மேற்பட்ட ஆண், பெண் தொழிலாளர்கள் வசிக்கின்றனர்.

இந்நிலையில், இப்பகுதியில் கப்பல் கட்டும் தளத்திற்காக நிலம் கையகப்படுத்த வெளியிடப்பட்ட அறிவிப்பிற்கு எதிர்ப்பு தெரிவித்து உப்பு உற்பத்தியாளர்கள், தொழிலாளர்கள், மீனவர்கள் மற்றும் வியாபாரிகள் தொடர்ந்து போராட்டத்தில் ஈடுபட்டு வருகின்றனர். சார் ஆட்சியர் பிரபு நடத்திய பேச்சுவார்த்தையில் உடன்பாடு ஏற்படாததால், முள்ளக்காடு பேருந்து நிறுத்தம் அருகே தொடர் காத்திருப்புப் போராட்டம் நடைபெற்றது.

இப்போராட்டத்தில் தூத்துக்குடி மாவட்ட அதிமுக செயலாளரும் முன்னாள் அமைச்சருமான எஸ்.பி. சண்முகநாதன் மற்றும் வெங்கடேஷ் பண்ணையார் நற்பணி இயக்க நிறுவனத் தலைவர் சுபாஷ் பண்ணையார் ஆகியோர் நேரில் கலந்துகொண்டு ஆதரவு தெரிவித்தனர்.

போராட்டத்தில் சுபாஷ் பண்ணையார் பேசியதாவது: "இப்பகுதி மக்களின் பிரதான வாழ்வாதாரமே உப்புத் தொழிலும் மீன்பிடித் தொழிலும் தான். ஏற்கனவே பனைத் தொழில் முற்றிலும் பாதிக்கப்பட்ட நிலையில், தற்போது உப்பளத் தொழிலையும் அழிக்கும் நடவடிக்கைகள் நடைபெறுகின்றன. இதற்குத் தீர்வு காண வேண்டியவர்கள் அதிகாரிகள் அல்ல; தமிழக அரசுதான்.

உப்பள உற்பத்தியாளர்கள், தொழிலாளர்கள் மற்றும் மீனவர்கள் தங்களது வாழ்வாதாரத்தைக் காக்கப் போராட்டத்தில் தீவிரமாக இறங்கும் நிலை ஏற்பட்டால், தூத்துக்குடி மாவட்டம் அமைதியாக இருக்காது. எனவே, அரசே எங்களைப் போராட்டத்திற்குத் தள்ளாமல் உடனடியாக இதற்குத் தீர்வு காண வேண்டும். தொழில்துறை அமைச்சர் கீர்த்தனாவைச் சந்திக்க முடியவில்லை. அரசாங்கம் உடனடியாக நடவடிக்கை எடுக்கத் தவறினால், அடுத்தகட்டப் போராட்டம் சென்னை வள்ளுவர் கோட்டத்தில் நடைபெறும்." என்றார்

இப்போராட்டத்தில் உற்பத்தியாளர் சங்க நிர்வாகிகள் செயலாளா் சேகர், தலைவர் மந்திரமூர்த்தி, பொருளாளர் பொன்ராஜ், நிர்வாகிகள் சின்னராஜ், முகேஷ் சண்முகவேல், முருகேசன், எல்.ஆர். சிவாகர், பாலசுப்பிரமணியன், ஈ பால், பிரபாகர் மற்றும் தொழிற்சங்கங்களைச் சேர்ந்த பொன்ராஜ், பரமசிவன், பேச்சிமுத்து மற்றும் முத்தையாபுரம், முள்ளக்காடு, பொட்டல்காடு, புல்லாவழி, எம். சவேரியார்புரம் ஆகிய பகுதிகளைச் சேர்ந்த ஆயிரக்கணக்கான தொழிலாளர்கள் கலந்துகொண்டு, பாரம்பரிய உப்புத்தொழில், மீன்பிடித் தொழில் மற்றும் இயற்கை வளங்களை அழிக்கக் கூடாது என முழக்கங்களை எழுப்பினர்.