தூத்துக்குடியில் நாளை கனிமொழி இறுதி கட்ட தேர்தல் பிரச்சாரம்: அமைச்சர் கீதாஜீவன் அறிக்கை!

தூத்துக்குடி நாடாளுமன்றத் தொகுதியில் போட்டியிடும் திமுக வேட்பாளர் கனிமொழி கருணாநிதி நாளை (ஏப்.17) இறுதிகட்ட தேர்தல் பிரச்சாரம் மேற்கொள்கிறார். 

இது தொடர்பாக திமுக தூத்துக்குடி வடக்கு மாவட்டச் செயலாளர் அமைச்சர் பி.கீதாஜீவன் வெளியிட்ட அறிக்கையில், "தூத்துக்குடி நாடாளுமன்றத் தொகுதியில் I.N.D.I.A கூட்டணி சார்பில் தி.மு.க. வேட்பாளராக கனிமொழி கருணாநிதி போட்டியிடுகிறார்கள். கிராமம், கிராமமாகச் சென்று வாக்கு சேகரித்துவரும் அவர் நாளை 17.04.2024 புதன்கிழமை அன்று தூத்துக்குடி, கோவில்பட்டி, விளாத்திகுளம் ஆகிய 3 சட்டமன்ற தொகுதிகளில்இறுதிகட்ட தேர்தல் பிரச்சாரம் செய்திட இருக்கிறார்.

அதன்படி 17.04.2024 புதன்கிழமை மாலை 3.00 மணி அளவில் கோவில்பட்டி சட்டமன்ற தொகுதிக்கு உட்பட்ட கயத்தாறு புதிய பேரூந்து நிலையம் முன்பு தேர்தல் பிரச்சாரம் செய்யும் அவர் தொடர்ச்சியாக மாலை 3.30 மணி அளவில் கோவில்பட்டி மேற்கு ஒன்றியத்திற்கு உட்பட்ட ஆலம்பட்டி விலக்கில் நடைபெறும் தேர்தல் பிரச்சாரத்தில்கலந்து கொண்டு வாக்கு சேகரிக்கிறார்.

அதன்பின் மாலை 4.00 மணி அளவில் விளாத்திகுளம் சட்டமன்ற தொகுதிக்கு உட்பட்ட எட்டையபுரம் பேரூந்து நிலையம் முன்பு தேர்தல் பிரச்சாரம் செய்கிறார்.இறுதி கட்டமாக மாலை 4.30 மணிக்கு தூத்துக்குடி சட்டமன்ற தொகுதிக்கு உட்பட்ட தூத்துக்குடி V.V.D. மெயின் ரோடு, அண்ணாநகர் 7 - வது தெரு டூவிபுரம் 5 வது தெரு சந்திப்பில் I.N.D.I.A கூட்டணி நடைபெறும் தேர்தல் பிரச்சார பொதுக்கூட்டத்தில் கலந்து கொண்டு தனது இறுதிகட்ட பிரச்சாரத்தை நிறைவு செய்கிறார்.

அந்தந்த பகுதிக்கு உட்பட்ட தி.மு.கழக நிர்வாகிகள் ஏற்பாடுகளை சிறப்பாக செய்திடவும், I.N.D.I.A கூட்டணிக் கட்சிகளின் நிர்வாகிகள், தொண்டர்கள், பொதுமக்கள் அனைவரும் பெருந்திரளாகக் கலந்து கொள்ளவும் அன்புடன் கேட்டுக்கொள்கிறேன். இவ்வாறு அறிக்கையில் தெரிவிக்கப்பட்டுள்ளது.