எங்கள் ஓட்டு உங்களுக்கு கிடையாது: அமைச்சர் அனிதா ராதாகிருஷ்ணனுக்கு முஸ்லிம் பெண்கள் எதிர்ப்பு!

திருச்செந்தூர் தொகுதியில் ஏழாவது முறையாகப் போட்டியிடும் அமைச்சர் அனிதா ராதாகிருஷ்ணனின் பிரசார வாகனத்தை மறித்து, முஸ்லிம் பெண்கள் வாக்குவாதத்தில் ஈடுபட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.

திருச்செந்தூர் தொகுதியில் ஆறு முறை வெற்றி பெற்றுள்ள மீன்வளத்துறை அமைச்சர் அனிதா ராதாகிருஷ்ணன், தற்போது திமுக சார்பில் மீண்டும் களம் இறங்கியுள்ளார். கடந்த ஏப்ரல் 6-ஆம் தேதி முதல் அவர் தீவிர பிரசாரத்தில் ஈடுபட்டு வருகிறார். இருப்பினும், அவர் செல்லும் பல்வேறு இடங்களில் உள்ளூர் மக்களிடம் இருந்து எதிர்ப்புகள் கிளம்பி வருகின்றன. ஏற்கனவே கல்விளை, கோட்டூர், ஆறுமுகநேரி உள்ளிட்ட பகுதிகளில் மக்கள் அவரது வாகனத்தை மறித்துத் தங்களது அதிருப்தியைத் தெரிவித்திருந்தனர்.

இந்நிலையில், காயல்பட்டினம் நகராட்சி பகுதியில் அமைச்சர் அனிதா ராதாகிருஷ்ணன் நேற்று முன்தினம் பிரசாரம் மேற்கொண்டார். முஸ்லிம் மக்கள் அதிகம் வசிக்கும் பகுதிக்கு அவரது வாகனம் சென்றபோது, அங்கிருந்த பெண்கள் வாகனத்தை வழிமறித்து தெருவிற்குள் வர விடாமல் தடுத்தனர்.

வாக்குவாதத்தில் ஈடுபட்ட பெண்கள், கடந்த காலங்களில் மழை மற்றும் வெள்ள பாதிப்புகள் ஏற்பட்டபோது, தங்கள் பகுதிக்கு எந்தவித அடிப்படை வசதிகளையும் அரசு செய்து தரவில்லை. வரும் காலங்களில் வெள்ள பாதிப்புகளைத் தடுக்க எவ்வித முன்னெச்சரிக்கை அல்லது முன்னேற்றப் பணிகளும் மேற்கொள்ளப்படவில்லை. "எங்கள் ஓட்டு உங்களுக்கு கிடையாது; திரும்பிச் செல்லுங்கள்" எனப் பெண்கள் கோஷமிட்டனர். 

அவர்களிடம் அமைச்சர் பேச்சுவார்த்தை நடத்த முயன்றபோதும், "எங்கள் தெருவிற்குள் வராதீர்கள்" எனப் பெண்கள் பிடிவாதமாகக் கூறியதால், நீண்ட நேரம் காத்திருந்த அமைச்சர் அங்கிருந்து ஏமாற்றத்துடன் திரும்பிச் சென்றார். அமைச்சர் செல்லும் இடமெல்லாம் எதிர்ப்பு கிளம்பி வரும் நிலையில், தற்போது சிறுபான்மையினர் அதிகம் வசிக்கும் பகுதியிலும் இந்த எதிர்ப்பு எதிரொலித்திருப்பது அரசியல் வட்டாரத்தில் அதிர்வலைகளை ஏற்படுத்தியுள்ளது.