காதர் மொய்தீன், திருமாவளவன் உள்ளிட்ட அரசியல் கட்சி தலைவர்களுடன் விஜய் சந்திப்பு

தமிழக முதலமைச்சராகப் பொறுப்பேற்றுள்ள விஜய், அரசியல் கட்சித் தலைவர்களைச் சந்தித்து வாழ்த்துப் பெறும் பயணத்தின் இரண்டாம் நாளாக நேற்று ஐ.யு.எம்.எல், காங்கிரஸ் மற்றும் விடுதலைச் சிறுத்தைகள் கட்சித் தலைவர்களை நேரில் சந்தித்துப் பேசினார்.

சென்னை மண்ணடியில் உள்ள இந்திய யூனியன் முஸ்லிம் லீக் தலைமை அலுவலகத்திற்குச் சென்ற முதலமைச்சர் விஜய், அக்கட்சியின் தேசியத் தலைவர் காதர் மொய்தீனைச் சந்தித்து வாழ்த்துப் பெற்றார். இந்தச் சந்திப்பின் போது நவாஸ் கனி எம்.பி மற்றும் எம்.எல்.ஏ-க்கள் உடனிருந்தனர்.

இதனைத் தொடர்ந்து சென்னை சத்தியமூர்த்தி பவனுக்கு வந்த முதலமைச்சரை, தமிழக காங்கிரஸ் தலைவர் செல்வப்பெருந்தகை கைகளைப் பிடித்து மக்கள் வெள்ளத்திற்கு நடுவே அலுவலகத்திற்குள் அழைத்துச் சென்றார். அங்கு அலங்கரிக்கப்பட்டிருந்த பெருந்தலைவர் காமராஜரின் திருவுருவப் படத்திற்கு விஜய் மலர் தூவி மரியாதை செலுத்தினார்.

காங்கிரஸ் சார்பில் வழங்கப்பட்ட "காமராஜ் ஒரு சகாப்தம்" என்ற புத்தகத்தை, உதவியாளரிடம் கொடுக்காமல் ஒரு பொக்கிஷம் போலத் தனது மடியிலேயே விஜய் வைத்திருந்தது தொண்டர்களிடையே நெகிழ்ச்சியை ஏற்படுத்தியது.

அங்கிருந்து வேளச்சேரியில் உள்ள விடுதலைச் சிறுத்தைகள் கட்சித் தலைவர் திருமாவளவனின் இல்லத்திற்கு முதலமைச்சர் சென்றார். திருமாவளவன் அவருக்கு ஏலக்காய் மாலை அணிவித்து, பிரம்மாண்டமாக வடிவமைக்கப்பட்ட இந்திய அரசியல் சாசனத்தின் முகப்புரை (Preamble) புகைப்படத்தை நினைவுப் பரிசாக வழங்கினார். இந்தச் சந்திப்பின் போது விசிக பொதுச்செயலாளர்கள் சிந்தனை செல்வன், ரவிக்குமார் உள்ளிட்ட முக்கிய நிர்வாகிகள் உடனிருந்தனர்.

முதலமைச்சர் விஜய்யின் இந்தப் பயணத்தின் போது அமைச்சர்கள் புஸ்சி ஆனந்த், ஆதவ் அர்ஜுனா ஆகியோர் உடனிருந்தனர். வேளச்சேரி சாலையில் திரண்டிருந்த ஆயிரக்கணக்கான பொதுமக்கள் முதலமைச்சருக்கு உற்சாக வரவேற்பு அளித்தனர். ஏற்கனவே கி.வீரமணி, மு.க.ஸ்டாலின், வைகோ, சீமான் ஆகியோரைச் சந்தித்த நிலையில், இந்தப் பயணங்கள் தமிழக அரசியலில் ஒரு ஆரோக்கியமான சூழலை ஏற்படுத்தியுள்ளன.