மே 10 முதல் 200 யூனிட் இலவச மின்சாரம் கணக்கீடு: ஆட்டோ-டெபிட் வசதியும் அறிமுகம்!

» செய்திகள் - விளையாட்டு » தமிழகம்

மே 10 முதல் 200 யூனிட் இலவச மின்சாரம் கணக்கீடு: ஆட்டோ-டெபிட் வசதியும் அறிமுகம்!

ஞாயிறு 17, மே 2026 11:42:15 AM (IST)

தமிழகத்தில் புதிய அரசு பொறுப்பேற்றதைத் தொடர்ந்து, முதலமைச்சர் விஜய் உத்தரவின்படி 200 யூனிட் இலவச மின்சாரத் திட்டத்தை மே 10-ஆம் தேதி முதல் நடைமுறைப்படுத்துவது குறித்து அனைத்து மாவட்ட கண்காணிப்பு பொறியாளர்களுக்கும் தமிழ்நாடு மின்சார விநியோக நிறுவனம் அவசரச் சுற்றறிக்கை அனுப்பியுள்ளது.

மேலும், மின் கட்டணத்தைத் தாமதமின்றிச் செலுத்த பெடரல் வங்கியுடன் இணைந்து புதிய 'தானியங்கிப் பற்று' (Auto-Debit) வசதியும் அறிமுகம் செய்யப்பட்டுள்ளது. தவெக அரசு தனது தேர்தல் அறிக்கையில் குறிப்பிட்டிருந்தபடி, வீட்டு மின் இணைப்புகளுக்கான புதிய இலவச மின்சார அரசாணையை வெளியிட்டுள்ளது.

500 யூனிட்டுக்குள் பயன்பாடு: இரு மாதங்களுக்கான மின்சாரப் பயன்பாடு மொத்தம் 500 யூனிட்டுகளுக்குள் இருந்தால், அவர்களுக்கு 200 யூனிட் வரை மின்சாரம் முற்றிலும் இலவசமாக வழங்கப்படும். இதன் மூலம் தமிழகத்தில் உள்ள சுமார் 2.23 கோடி குடும்பங்களுக்குத் தலா ரூ.235 வரை மின் கட்டணம் மிச்சமாகும்.

500 யூனிட்டுகளுக்கு மேல் பயன்பாடு: 500 யூனிட்டுகளுக்கும் அதிகமாக மின்சாரம் பயன்படுத்தும் நுகர்வோருக்கு, தற்போது நடைமுறையில் உள்ள பழைய திட்டத்தின்படியான 100 யூனிட் இலவச மின்சாரச் சலுகை தொடர்ந்து நீடிக்கும்.

கட்டண மென்பொருளில் (Billing Software) இதற்கான தகுதி சரிபார்ப்பு மற்றும் மானியக் கணக்கீட்டுப் பட்டியலின்படி கட்டணங்களை நிர்ணயிக்க வேண்டும் என்றும், இந்த விபரங்களை ஊழியர்களுக்குத் தெளிவுபடுத்த வேண்டும் என்றும் வாரியம் உத்தரவிட்டுள்ளது.

வங்கிக் கணக்கிலிருந்து நேரடியாகப் பணம்: புதிய ஆட்டோ-டெபிட் வசதி

தமிழகத்தில் தற்போது 85 சதவீத நுகர்வோர் ஆன்லைன் மூலமாகவே மின் கட்டணம் செலுத்துகின்றனர். ஒரு நாள் தாமதமானாலும் மின் இணைப்பு துண்டிப்பு மற்றும் அபராதம் போன்ற சிக்கல்கள் ஏற்படுவதைத் தவிர்க்க, மின்சார வாரியம் புதிய தானியங்கிப் பற்று (Auto-Debit) திட்டத்தைக் கொண்டுவந்துள்ளது.

செயல்படும் முறை:

தமிழ்நாடு மின்சார விநியோக நிறுவனம் (TNPDCL), பெடரல் வங்கியுடன் இணைந்து தேசிய தானியங்கி தீர்வு மையம் (NACH) தளம் மூலம் இச்சேவையை வழங்குகிறது.

நுகர்வோர்கள் தங்களது வங்கிக் கணக்கு விபரங்கள் மற்றும் தகுந்த அங்கீகாரச் சான்றுகளைச் (மின்னணுச் சரிபார்ப்பு) சமர்ப்பித்து, மின் வாரிய இணையதளத்தில் இச்சேவைக்குப் பதிவு செய்துகொள்ளலாம்.

மின் நுகர்வு கணக்கிடப்பட்ட (Assessment Date) தேதியிலிருந்து 10-ஆவது நாளில், இணைக்கப்பட்ட வங்கிக் கணக்கிலிருந்து மின் கட்டணம் தானாகவே பற்று வைக்கப்பட்டு, நுகர்வோருக்கு மின்னணு ரசீது (E-Receipt) அனுப்பி வைக்கப்படும்.

இந்த ஆட்டோ-டெபிட் வசதியை எப்போது வேண்டுமானாலும் ரத்து செய்யும் (Cancel) விருப்பத்தையும் மின் வாரியம் வழங்கியுள்ளது. ஒருவேளை வங்கிக் கணக்கில் போதிய பணம் இல்லாவிட்டால், நுகர்வோருக்குக் குறுஞ்செய்தி (SMS) மற்றும் மின்னஞ்சல் அனுப்பப்பட்டு மாற்று வழியில் செலுத்த அறிவுறுத்தப்படும்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

மே 10 முதல் 200 யூனிட் இலவச மின்சாரம் கணக்கீடு: ஆட்டோ-டெபிட் வசதியும் அறிமுகம்!

» செய்திகள் - விளையாட்டு » தமிழகம்