மகளிர் உரிமைத் தொகை திட்டத்தில் 80 லட்சம் பெண்கள் நீக்கம்? தமிழக அரசு விளக்கம்!

தமிழக அரசின் முன்னோடித் திட்டமான 'கலைஞர் மகளிர் உரிமைத் தொகை' திட்டத்தில் புதிய பயனாளிகள் யாரும் சேர முடியாது என்றும், ஏற்கனவே பயன்பெற்று வந்தவர்களில் சுமார் 80 லட்சம் பெண்கள் திட்டத்திலிருந்து அதிரடியாக நீக்கப்பட்டுள்ளதாகவும் கடந்த சில தினங்களாகச் சமூக வலைதளங்களில் ஒரு செய்தி காட்டுத்தீயாகப் பரவி வந்தது. இத்தகவல் இல்லத்தரசிகள் மத்தியில் பெரும் கவலையையும் குழப்பத்தையும் ஏற்படுத்தியிருந்த நிலையில், இது முற்றிலும் தவறான மற்றும் திட்டமிட்டுத் திரிக்கப்பட்ட வதந்தி என்று தமிழக அரசின் தகவல் சரிபார்ப்பகம் விளக்கமளித்துள்ளது.

இதுதொடர்பாகத் தமிழக அரசின் தகவல் சரிபார்ப்பகம் வெளியிட்டுள்ள அதிகாரப்பூர்வ மறுப்புப் பதிவில், மகாராஷ்டிராவில் அம்மாநில அரசு செயல்படுத்தி வரும் மகளிர் உதவித்தொகை திட்டத்திலிருந்து தகுதியற்ற 80 லட்சம் பெண்கள் நீக்கப்பட்டதாக அங்குள்ள ஊடகங்களில் செய்திகள் வெளியாகியிருந்தன.

அந்தச் செய்தியைச் சிலர் வேண்டுமென்றே திட்டமிட்டுத் திரித்து, தமிழ்நாட்டில் மகளிர் உரிமைத் தொகை திட்டத்தில் இருந்து 80 லட்சம் பெண்கள் நீக்கப்பட்டு விட்டதாகத் தவறான வதந்தியைச் சமூக வலைதளங்களில் பரப்பத் தொடங்கியுள்ளனர் எனச் சுட்டிக்காட்டியுள்ளது.

தமிழ்நாடு அரசு இதுபோன்று பயனர்கள் நீக்கம் தொடர்பான எந்தவொரு அறிவிப்பையும் வெளியிடவில்லை. தமிழ்நாட்டில் இத்திட்டத்தின் கீழ் தற்போதைய நிலவரப்படி மொத்தம் 1.31 கோடி பெண்கள் தொடர்ந்து பயன் பெற்று வருகிறார்கள். கடந்த மே மாதத்திற்கான மாதாந்திர உரிமைத் தொகை ரூ. 1,000/- கூடப் பயனாளர்களின் வங்கிச் கணக்குகளில் எவ்வித தடையுமின்றி முறைப்படி வரவு வைக்கப்பட்டுள்ளது.

எனவே, பொதுமக்கள் மற்றும் பெண்கள் சமூக வலைதளங்களில் பரப்பப்படும் இத்தகைய ஆதாரமற்ற போலிச் செய்திகளையும், வதந்திகளையும் நம்ப வேண்டாம் எனக் கேட்டுக்கொள்ளப்பட்டுள்ளது. அரசின் இந்தத் தெளிவான விளக்கத்தைத் தொடர்ந்து, கடந்த சில நாட்களாக நீடித்து வந்த வீண் வதந்திகளுக்கு முற்றுப்புள்ளி வைக்கப்பட்டுள்ளது.