கன்னியாகுமரி மாவட்டத்திற்கு புதிய ரயில் நிறுத்தங்கள் கிடைக்குமா? பயணிகள் கோரிக்கை!

தமிழ்நாட்டின் பிற மாவட்டங்களைப் போலன்றி, பரப்பளவில் சிறியதாகவும் அதே வேளையில் மிக அதிக மக்கள் தொகை அடர்த்தி கொண்டதாகவும் விளங்குவது கன்னியாகுமரி மாவட்டமாகும். 

இம்மாவட்டத்தில் பெருவாரியான மக்கள் கிள்ளியூர், திருவட்டார், கல்குளம் மற்றும் விளவன்கோடு ஆகிய தாலுகாக்களில் வசிக்கின்றனர். இப்பகுதிகளைச் சேர்ந்த பொதுமக்கள் தங்களின் அன்றாடப் பயணங்களுக்குப் பெரும்பாலும் இரணியல் மற்றும் குழித்துறை ரயில் நிலையங்களையே சார்ந்துள்ளனர். ஆனால், இந்த இரண்டு முக்கிய ரயில் நிலையங்களிலும் பல்வேறு முக்கிய ரயில்கள் நின்று செல்வதில்லை என்ற குறை பல ஆண்டுகளாகவே நீடித்து வருகிறது.

சமீபத்தில் கன்னியாகுமரி மாவட்ட பயணிகளின் பயன்பாட்டிற்காக நாகர்கோவில் - மங்களூர், திருவனந்தபுரம் - தாம்பரம் மற்றும் நாகர்கோவில் - நியூ ஜல்பாய்குரி ஆகிய மூன்று வழித்தடங்களில் புதிய அமித் பாரத் ரயில்கள் அறிவிக்கப்பட்டு இயக்கப்பட்டு வருகின்றன. ஆனால், இந்த ரயில்களில் நாகர்கோவில் - மங்களூர் அமித் பாரத் ரயிலுக்கு, மாவட்டத்தின் மிக முக்கிய ரயில் நிலையங்களான இரணியல் மற்றும் குழித்துறையில் நிறுத்தங்கள் அனுமதிக்கப்படவில்லை. 

இதேபோல், திருவனந்தபுரம் - தாம்பரம் அமித் பாரத் ரயிலுக்கும் இரணியல் ரயில் நிலையத்தில் நிறுத்தம் வழங்கப்படவில்லை. ரயில்வே துறையின் இந்தத் தொடர் நடவடிக்கை கன்னியாகுமரி மாவட்டத்தைப் புறக்கணிப்பதாகவே அமைந்துள்ளது என்று சமூக ஆர்வலர்கள் குற்றம் சாட்டுகின்றனர்.

முன்னதாக திருச்சியிலிருந்து திருநெல்வேலி வரை இயக்கப்பட்ட இன்டர்சிட்டி ரயில், திருவனந்தபுரம் வரை நீட்டிப்பு செய்யப்பட்டபோது, நாகர்கோவில் டவுன் மற்றும் குழித்துறை ரயில் நிலையங்களில் மட்டுமே நிறுத்தம் அனுமதிக்கப்பட்டது; ஆனால், இரணியல் ரயில் நிலையம் முற்றிலும் புறக்கணிக்கப்பட்டது. தற்போது இரணியல் ரயில் நிலையத்தில் தினசரி மொத்தம் 22 ரயில்கள் நின்று செல்கின்றன. இங்கிருந்து நாகர்கோவில் ரயில் நிலையம் 18 கி.மீ தொலைவிலும், குழித்துறை ரயில் நிலையம் 15 கி.மீ தொலைவிலும் அமைந்துள்ளன. 

இதனால் கல்குளம் தாலுகாவைச் சேர்ந்த பயணிகள் இந்த இன்டர்சிட்டி ரயிலில் பயணிக்க வேண்டுமானால், கூடுதல் கட்டணத்துடனும் சிரமத்துடனும் குழித்துறை அல்லது நாகர்கோவில் நிலையங்களுக்குச் செல்ல வேண்டிய கட்டாயம் உள்ளது. திருச்சி - திருவனந்தபுரம் இன்டர்சிட்டி ரயிலுக்கு இரணியல் ரயில் நிலையத்தில் நிறுத்தம் கோரி 2017-ஆம் ஆண்டு முதல் போராடியும், இதுவரை அதற்கான அனுமதி கிடைக்கவில்லை என்பது பொதுமக்களின் பெருத்த ஆதங்கமாக உள்ளது.

இதேபோல், நாகர்கோவில் - காந்திதாம் எக்ஸ்பிரஸ் மற்றும் திருநெல்வேலி – ஜாம்நகர் எக்ஸ்பிரஸ் ஆகிய கொங்கன் இருப்புப்பாதை வழியாகச் செல்லும் இரண்டு ரயில்களுக்கும் குழித்துறை ரயில் நிலையத்தில் நிறுத்தம் வேண்டும் என்ற கோரிக்கையும் பல ஆண்டுகளாக நிலுவையில் உள்ளது. 

ஆனால், திருநெல்வேலி – ஜாம்நகர் ரயிலுக்குக் குழித்துறையை விடப் பல மடங்கு வருவாய் குறைந்த கேரள எல்லையில் உள்ள பாறசாலையில் கடந்த 2019-ஆம் ஆண்டே ரயில்வே துறை நிறுத்தம் வழங்கியது. ஆனால், தமிழகப் பகுதியான குழித்துறையில் இன்றுவரை நிறுத்தம் வழங்கப்படவில்லை. குமரி மாவட்டத்தைச் சேர்ந்தவர் மத்திய அமைச்சராக இருந்த காலகட்டத்தில்கூட இந்த நிறுத்தத்தைப் பெற முடியாமல் போனது குறிப்பிடத்தக்கது.

அண்டை மாநிலமான கேரளாவைச் சேர்ந்த நாடாளுமன்ற உறுப்பினர்கள் தங்கள் தொகுதிக்கு உட்பட்ட ரயில் நிலையங்களுக்குப் புதிய நிறுத்தங்கள் தேவைப்பட்டால், உடனடியாக டெல்லிக்குச் சென்று ரயில்வே வாரிய அதிகாரிகளை நேரில் சந்திக்கின்றனர். அங்கு உரிய புள்ளியியல் விவரங்கள் மற்றும் வருவாய் ஆதாரங்களைச் சமர்ப்பித்து வாதாடி, நிறுத்தத்திற்கான ஆணையை உடனடியாகப் பெற்று வருகின்றனர்.

எனவே, கேரள எம்.பி-க்களைப் போலவே கன்னியாகுமரி நாடாளுமன்ற உறுப்பினரும் வெறும் கோரிக்கை மனுக்களை மட்டும் தபாலில் கொடுத்துக் கொண்டிருக்காமல், போர்க்குணத்துடன் டெல்லிக்குச் சென்று ரயில்வே வாரிய அதிகாரிகளை நேரில் சந்தித்து, இந்த புதிய ரயில் நிறுத்தங்களுக்கான அதிகாரப்பூர்வ உத்தரவை உடனடியாக வாங்கி வர வேண்டும் என்று குமரி மாவட்டப் பயணிகள் சங்கமும் பொதுமக்களும் அதிரடியாக வலியுறுத்தியுள்ளனர்.