தேசிய ஐஸ் ஹாக்கி போட்டியில் வெள்ளிப் பதக்கம்: கன்னியாகுமரி மாணவனுக்கு ஆட்சியர் வாழ்த்து!

உத்தரகாண்ட் மாநிலத்தில் நடைபெற்ற தேசிய ஐஸ் ஹாக்கி சாம்பியன்ஷிப் போட்டியில் இரண்டாம் இடம் பிடித்து வெள்ளிப் பதக்கம் வென்ற கன்னியாகுமரி மாவட்டத்தைச் சேர்ந்த பள்ளி மாணவனை மாவட்ட ஆட்சியர் பிரதாப் நேரில் சந்தித்துப் பாராட்டியுள்ளார்!

கன்னியாகுமரி மாவட்ட ஆட்சியர் அலுவலகத்தில், மாவட்ட விளையாட்டுத் துறை சார்பில் தேசிய அளவிலான ஐஸ் ஹாக்கி போட்டியில் சாதனை படைத்த மாணவன் ஆட்சியரைச் சந்தித்து வாழ்த்துப் பெற்றார்.

தேசிய ஐஸ் ஹாக்கி சாம்பியன்ஷிப் 2026 போட்டிகள் உத்தரகாண்ட் மாநிலம் டேராடூனில் கடந்த ஜூன் 15 முதல் ஜூன் 18 வரை நடைபெற்றன. இப்போட்டியில் இந்த ஆண்டு முதன்முறையாக 15 வயதிற்குட்பட்டோருக்கான (Under-15) பிரிவுகள் அறிமுகப்படுத்தப்பட்டன.

மாணவனின் சாதனை: இப்போட்டியின் 'Under-15 Boys' பிரிவில் தமிழ்நாடு அணியின் சார்பில் கன்னியாகுமரி மாவட்டம், களியக்காவிளை அருகே உள்ள மரியாகிரி புனித மேரிஸ் சிபிஎஸ்இ பள்ளியின் ஒன்பதாம் வகுப்பு மாணவன் ஆஷிக் கலந்துகொண்டு விளையாடினார். விறுவிறுப்பாக நடைபெற்ற இறுதிப் போட்டியில் தமிழ்நாடு அணி இரண்டாம் இடம் பிடித்து வெள்ளிப் பதக்கத்தைக் கைப்பற்றியது.

இளம் வயதிலேயே பனிச்சறுக்கு விளையாட்டான ஐஸ் ஹாக்கியில் தேசிய அளவில் சாதனை படைத்த மாணவன் ஆஷிக்கிற்குத் தனது மனமார்ந்த வாழ்த்துகளையும் பாராட்டுகளையும் மாவட்ட ஆட்சியர் பிரதாப் தெரிவித்தார். மேலும், மாவட்டத்தைச் சேர்ந்த அனைத்து விளையாட்டு வீரர், வீராங்கனைகளும் இது போன்ற பல்வேறு போட்டிகளில் பங்கேற்று வெற்றி பெற்று நாட்டிற்கும், மாநிலத்திற்கும் மற்றும் மாவட்டத்திற்கும் பெருமை சேர்த்திட வேண்டும் என அவர் கேட்டுக்கொண்டார்.

இந்நிகழ்ச்சியின் போது மாவட்ட விளையாட்டு அலுவலர் வினு உட்பட அரசுத் துறை அதிகாரிகள் பலர் உடனிருந்தனர்.