இந்து முன்னணி நிர்வாகிகள் மீது வழக்குப் பதிவு: மாநிலத் துணைத் தலைவர் கண்டனம்!

நீதிமன்ற உத்தரவின்படி ஆக்கிரமிப்புகளை அகற்றக் கோரிப் போராட்டத்தில் ஈடுபட்ட இந்து முன்னணி மாநிலத் தலைவர் மற்றும் நிர்வாகிகள் மீது திருவட்டார் காவல் துறையினர் வழக்குப் பதிவு செய்துள்ளதற்கு இந்து முன்னணி கண்டனம் தெரிவித்துள்ளது.

இது குறித்து இந்து முன்னணி மாநிலத் துணைத் தலைவர் வி.பி. ஜெயக்குமார் வெளியிட்டுள்ள அறிக்கை: கன்னியாகுமரி மாவட்டம் திருவட்டார் ஒன்றியத்தில் உள்ள மாத்தூர் தொட்டிப் பாலம் சுற்றுலாத் தலப் பகுதியில் அரசு அனுமதியின்றி வழிபாட்டுத் தலம் கட்டப்பட்டுள்ளது. இந்த ஆக்கிரமிப்பை முழுமையாக இடித்து அப்புறப்படுத்த வேண்டும் என உயர்நீதிமன்றம் உத்தரவிட்டுள்ளது. ஆனால், அரசு இந்த உத்தரவை அமல்படுத்தாததைக் கண்டித்து, கடந்த ஜூலை 12, 2026 அன்று இந்து முன்னணி மாநிலத் தலைவர் தலைமையில் ஆர்ப்பாட்டம் நடைபெற்றது.

அமைதியான முறையில், போக்குவரத்து மற்றும் ஆம்புலன்ஸ் போன்ற அவசர வாகனங்களுக்கு வழிவிட்டு ஒழுங்கு நடைமுறைகளுடன் இந்த ஆர்ப்பாட்டம் நடைபெற்றது. எந்தவித சட்டம் - ஒழுங்குப் பிரச்சினையும் ஏற்படாத சூழலில், திருவட்டார் காவல் நிலைய ஆய்வாளர் இந்த ஆர்ப்பாட்டத்தில் பங்கேற்ற இந்து முன்னணி மாநிலத் தலைவர் மற்றும் நிர்வாகிகள் மீது வழக்குப் பதிவு செய்துள்ளார்.

அரசியலமைப்புச் சட்டம் வழங்கியுள்ள அடிப்படை உரிமையின்படி ஜனநாயக ரீதியில் நடைபெற்ற போராட்டத்திற்கு வழக்குப் பதிவு செய்யப்பட்டுள்ளது. முந்தைய ஆட்சிக் காலங்களில் மக்கள் பிரச்சினைகளுக்காகப் போராடியவர்கள் மீது மேற்கொள்ளப்பட்ட அதே போன்ற அடக்குமுறை நடவடிக்கைகளைத் தற்போதைய தவெக அரசும் கையாண்டு வருகிறது. எனவே, இந்து முன்னணி நிர்வாகிகள் மீது பதியப்பட்டுள்ள இந்த வழக்குகளைத் தமிழக அரசு உடனடியாகத் திரும்பப் பெற வேண்டும் என அந்த அறிக்கையில் கேட்டுக்கொள்ளப்பட்டுள்ளது.