நீரோவின் ஆட்சி போல் தவெக அரசு செயல்படுகிறது : எடப்பாடி பழனிசாமி கண்டனம்!

நாடும் நாட்டு மக்களும் எக்கேடாய்ப் போனால் என்ன என்று தமிழக ஆட்சியாளர்கள் கொண்டாட்டத்தில் திளைப்பதாக அதிமுக பொதுச் செயலாளர் எடப்பாடி பழனிசாமி குற்றம் சாட்டியுள்ளார்.

திருச்சி அரசு தலைமை மருத்துவமனையில் சிகிச்சை பெற்று வந்த 68 வயது மூதாட்டியின் கால் விரலை எலிகள் கடித்துக் குதறியதாக வெளியான செய்தி தொடர்பாக அதிமுக பொதுச் செயலாளர் எடப்பாடி பழனிசாமி தனது 'எக்ஸ்' சமூக வலைதளப் பக்கத்தில் அறிக்கை வெளியிட்டுள்ளார்.

அந்த அறிக்கையில், "திருச்சி அரசு தலைமை மருத்துவமனையில் சிகிச்சை பெற்று வந்த 68 வயதுப் பெண்ணின் கால் விரலை எலிகள் கடித்துக் குதறியதாக வரும் செய்தி மிகுந்த அதிர்ச்சியளிக்கிறது. தமிழ்நாட்டில் அரசு மருத்துவமனைகளை இன்றைய அரசு எப்படி வைத்திருக்கிறது என்பதற்கு இந்தச் செய்தியே சாட்சி. அரசை நம்பி சிகிச்சை பெற வந்து, எலி கடித்துக் கால் விரலை இழந்துள்ள அந்தப் பெண்ணிற்கு இந்த அரசு என்ன பதில் வைத்திருக்கிறது?" எனக் கேள்வி எழுப்பியுள்ளார்.

மேலும், "மக்கள் இப்படித் திண்டாடிக் கொண்டிருக்க, இத்துறையின் அமைச்சரோ திரைப்படம் பார்த்துக் கொண்டாடிச் சுயபடம் பதிவிட்டுக் கொண்டிருக்கிறார். அவர் மட்டுமல்லாமல், இன்று முதல்வர் முதல் அமைச்சர்கள் வரை அனைவரும் படம் பார்க்க விடுமுறை எடுத்துள்ளதாகச் செய்திகள் வருகின்றன. 

நாடும் நாட்டு மக்களும் எக்கேடாய்ப் போனால் என்ன என்று கொண்டாட்டத்தில் திளைக்கும் புதிய நீரோ அரசிற்கு எனது கடும் கண்டனம். உடனடியாகப் பாதிக்கப்பட்ட பெண்ணிற்கு உரிய மருத்துவச் சிகிச்சை அளிப்பதுடன், அவருக்கான இழப்பீடும் வழங்க வேண்டும் என வலியுறுத்துகிறேன்" என எடப்பாடி பழனிசாமி தெரிவித்துள்ளார்.