நாகர்கோவில் - கோவை ரயிலை நேமம் வரை நீட்டிக்க வேண்டும்: பயணிகள் சங்கம் கோரிக்கை!

கேரளப் பயணிகளுக்காக நேமம் ரயில் நிலையத்தை 117 கோடி ரூபாய் மதிப்பில் முனையமாக மாற்றும் திட்டம் தயாரிக்கப்பட்டு, 4 நடைமேடைகள், 2 பிட்லைன்கள் மற்றும் 4 ஸ்டேபிளிங் லைன்களுடன் பணிகள் அதிவேகமாக நடைபெற்று வருகின்றன.

2027 மார்ச் மாதம் திருவனந்தபுரம் தெற்கு ரயில் நிலையத்தின் முதற்கட்டமாக நேமம் முனையம் திறக்கப்படவுள்ளது. இதன் மூலம் கேரளாவுக்காக இயக்கப்படும் புதிய ரயில்களுக்கான தொடக்கப் புள்ளியாக நேமம் மாறும் என்றும், இது மறைமுகமாகக் கன்னியாகுமரி மாவட்ட மக்களுக்குப் பெரிதும் பயனுள்ளதாக அமையும் என்றும் குமரி மாவட்ட ரயில் பயணிகள் சங்கம் தெரிவித்துள்ளது.

இது குறித்து குமரி மாவட்ட ரயில் பயணிகள் சங்கப் பொதுச்செயலாளர் பி. எட்வர்ட் ஜெனி வெளியிட்டுள்ள அறிக்கையில் கூறப்பட்டுள்ளதாவது: பொதுவாக ரயில்கள் குறிப்பிட்ட தொலைவு இயங்கி முடிந்ததும், பிட்லைன் பராமரிப்புக்காகக் கொண்டு செல்லப்பட்டு 8 மணி நேரம் முதன்மை அல்லது இரண்டாம் நிலை பராமரிப்பு செய்யப்படும். தென்மாவட்டங்களில் மதுரை, ராமேஸ்வரம், தூத்துக்குடி, திருநெல்வேலி, எர்ணாகுளம், திருவனந்தபுரம், கொச்சுவேலி, நாகர்கோவில் ஆகிய ரயில் நிலையங்களில் மட்டுமே இந்த பிட்லைன் வசதி உள்ளது.

கேரளப் பயணிகளுக்காக நேமம் ரயில் நிலையத்தை 117 கோடி ரூபாய் மதிப்பில் முனையமாக மாற்றும் திட்டம் தயாரிக்கப்பட்டு, 4 நடைமேடைகள், 2 பிட்லைன்கள் மற்றும் 4 ஸ்டேபிளிங் லைன்களுடன் பணிகள் அதிவேகமாக நடைபெற்று வருகின்றன. திருவனந்தபுரத்திலிருந்து நேமம் வரையிலான ரயில் பாதையை இரட்டிப்பாக்கும் பணியும் நடைபெறுகிறது.

பிட்லைன் இடநெருக்கடி தீரும்: நேமத்தில் பிட்லைன் வசதி வருவதால், கேரளாவுக்கு இயக்கப்படும் புதிய ரயில்கள் நேமத்திலேயே பராமரிக்கப்படும். இதனால் நாகர்கோவில் பிட்லைன்களில் இடநெருக்கடி குறைந்து, நாகர்கோவிலிலிருந்து திருநெல்வேலி - மதுரை மார்க்கமாகப் புதிய ரயில்களை இயக்க அதிக வாய்ப்புகள் ஏற்படும்.

பயணிகளுக்கு வசதி: நாகர்கோவில் மற்றும் திருநெல்வேலியிலிருந்து புறப்படும் சில ரயில்களை நேமம் வரை நீட்டிக்கும்போது, கல்குளம், விளவங்கோடு, திருவட்டார் தாலுகாக்களைச் சேர்ந்த சுமார் 65% மக்கள் நாகர்கோவில் வராமலேயே, இரணியல் மற்றும் குழித்துறை வழியே பயணிக்க முடியும்.

• நாகர்கோவில் - கோயம்பத்தூர் பகல்நேர ரயிலையும், நாகர்கோவில் - மும்பை ரயிலையும் இரணியல், குழித்துறை வழியாகத் திருவனந்தபுரம் தெற்கு (நேமம்) வரை நீட்டித்து இயக்க வேண்டும்.

• இதற்குப் பதிலாகத் திருவனந்தபுரம் - மங்களூர் தினசரி ரயிலை நாகர்கோவில் வரை நீட்டித்து இயக்க வேண்டும்.

• திருநெல்வேலியிலிருந்து இயக்கப்படும் நெடுந்தூர ரயில்களைத் திருவனந்தபுரம் தெற்கு வரை நீட்டித்து இயக்க நடவடிக்கை எடுக்க வேண்டும்.

அண்டை மாநிலத்தில் உள்கட்டமைப்பு வசதிகள் பெருகும்போது எரிச்சலடையாமல், அதேபோன்று நீண்டகால நோக்கில் நாகர்கோவில் ரயில் நிலையத்திலும் கூடுதல் வசதிகளைப் பெற நாம் ஒன்றிணைந்து கோரிக்கை வைக்க வேண்டும் எனச் சங்கத்தின் சார்பில் கேட்டுக்கொள்ளப்பட்டுள்ளது.