கோலி, படிக்கல் அதிரடியில் பெங்களூரு வெற்றி: சாய் சுதர்சனின் சதம் வீணானது!

ஐபிஎல் தொடரின் 34-ஆவது லீக் ஆட்டத்தில், குஜராத் டைட்டன்ஸ் அணிக்கு எதிரான போட்டியில் ராயல் சேலஞ்சர்ஸ் பெங்களூரு அணி 5 விக்கெட்டுகள் வித்தியாசத்தில் அபார வெற்றி பெற்றது.

இப்போட்டியில் டாஸ் வென்ற பெங்களூரு அணி பந்துவீச்சைத் தேர்வு செய்தது. இதன்படி முதலில் களம் புகுந்த குஜராத் அணியில், தொடக்க வீரர் சாய் சுதர்சன் மற்றும் கேப்டன் ஷுப்மன் கில் இணை முதல் விக்கெட்டுக்கு 128 ரன்கள் சேர்த்து வலுவான அடித்தளம் அமைத்தது. நிதானமாக ஆடிய கில் 32 ரன்களில் ஆட்டமிழந்தார்.

மறுபுறம் அதிரடியைத் தொடர்ந்த சாய் சுதர்சன், மைதானத்தின் நாலாபுறமும் பந்துகளைச் சிதறடித்தார். 58 பந்துகளில் 11 பவுண்டரிகள், 5 சிக்ஸர்களுடன் தனது கன்னிச் சதத்தைப் (100 ரன்கள்) பதிவு செய்து அவர் ஆட்டமிழந்தார். ஜாஸ் பட்லர் 25 ரன்கள் சேர்த்தார். இறுதியில் வாஷிங்டன் சுந்தர் (19*) மற்றும் ஜேசன் ஹோல்டர் (23*) அதிரடி காட்ட, குஜராத் அணி 20 ஓவர்களில் 3 விக்கெட் இழப்புக்கு 205 ரன்கள் குவித்தது. பெங்களூரு தரப்பில் புவனேஷ்வர் குமார், ஜாஷ் ஹேஸில்வுட், சுயாஷ் சர்மா ஆகியோர் தலா 1 விக்கெட் வீழ்த்தினர்.

206 ரன்கள் என்ற கடினமான இலக்கை நோக்கி ஆடிய பெங்களூரு அணியில், ஜேக்கப் பெத்தெல் 14 ரன்களில் வெளியேறினார். பின்னர் இணைந்த விராட் கோலி - தேவ்தத் படிக்கல் கூட்டணி குஜராத் பந்துவீச்சைத் துவம்சம் செய்தது. இந்த இணை 2-ஆவது விக்கெட்டுக்கு 115 ரன்கள் சேர்த்தது.

அதிரடியாக ஆடிய படிக்கல் 19 பந்துகளில் அரைசதம் கடந்து, மொத்தமாக 55 ரன்களுக்கு (2 பவுண்டரி, 6 சிக்ஸர்) ஆட்டமிழந்தார். அவரைத் தொடர்ந்து சதத்தை நெருங்கிய விராட் கோலி 44 பந்துகளில் 81 ரன்கள் (8 பவுண்டரி, 4 சிக்ஸர்) எடுத்து அவுட்டானார். ஜிதேஷ் சர்மா (10), ரஜத் பட்டிதார் (8) சொற்ப ரன்களில் வெளியேறினர்.

இறுதி நேரத்தில் டிம் டேவிட் மற்றும் கிருணால் பாண்டியா இணை நிதானமாக ஆடி அணியை வெற்றிக்கு அழைத்துச் சென்றது. பாண்டியா 23 ரன்கள் சேர்த்து ஆட்டமிழக்காமல் இருந்தார். இதன் மூலம் பெங்களூரு அணி 18.5 ஓவர்களில் 206 ரன்கள் எடுத்து வெற்றியைச் சுவைத்தது. குஜராத் தரப்பில் ரஷீத் கான் 2 விக்கெட்டுகளைக் கைப்பற்றினார்.