பிரபாஸ், அமிதாப் பச்சனுடன் இணைந்தார் கமல்ஹாசன்!

புராஜெக்ட் கே படத்தில் பிரபாஸ், அமிதாப் பச்சனுடன் இணைந்தார் கமல்ஹாசன். இதுகுறித்த அதிகாரப்பூர்வ அறிவிப்பு வெளியாகி உள்ளது. 

ஆதிபுருஷ் படத்துக்கு பிறகு தற்போது புராஜெக்ட் கே படத்தில் பிரபாஸ் நடித்து வருகிறார். இந்தப் படத்தை நடிகையர் திலகம் உள்ளிட்ட படங்களை இயக்கிய நாக் அஸ்வின் இயக்கிவருகிறார். சந்தோஷ் நாராயணன் இந்தப் படத்துக்கு இசையமைக்கிறார். வைஜெயந்தி மூவிஸ் தயாரிக்கும் இந்தப் படத்தில் அமிதாப் பச்சன் தீபிகா படுகோனே, தீஷா பதானி உள்ளிட்டோர் நடிக்கின்றனர். 

மேலும், இந்தப் படத்தில் நடிகர் கமல்ஹாசன் வில்லனாக நடிக்கவிருப்பதாகவும் அதற்காக அவருக்கு ரூ.150 கோடி சம்பளம் பேசியிருப்பதாகவும் சமூக வலைதளங்களில் கடந்த சில நாட்களாக தகவல் பரவின. இந்நிலையில் இதனை படத்தை தயாரித்து வரும் வைஜெயந்தி மூவிஸ் அதிகாரப்பூர்வமாக அறிவித்துள்ளது. இதற்காக ஸ்பெஷல் புரமோவையும் வெளியிட்டுள்ளது. கமல்ஹாசன் இணைந்துள்ளதால் இந்தப் படத்தின் மீதான எதிர்பார்ப்பு அதிகரித்துள்ளது. இந்தப் படத்துக்கு இன்னும் பெயரிடப்படவில்லை.