விஜய்தான் அடுத்த முதல்வர்: நட்டி நட்ராஜ் ஆதரவு!

தமிழக வெற்றிக் கழகத்தின் தலைவர் விஜய் வரவிருக்கும் சட்டமன்றத் தேர்தலில் வெற்றி பெற்று முதல்வராவார் என்று நடிகர் நட்டி நட்ராஜ் தனது ஆதரவைத் தெரிவித்துள்ளார்.

2026 தமிழ்நாடு சட்டமன்றப் பொதுத்தேர்தலை முன்னிட்டு, தமிழக வெற்றிக் கழகத்தின் (தவெக) தலைவர் விஜய் மாநிலம் முழுவதும் தீவிர பிரசாரத்தில் ஈடுபட்டு வருகிறார். இந்தத் தேர்தலில் விஜய்யின் அரசியல் வருகை தமிழக வாக்கு சதவீதத்தில் பெரும் மாற்றத்தை ஏற்படுத்தும் என்று அரசியல் நோக்கர்களால் கணிக்கப்பட்டுள்ளது.

சமீபத்தில் நடிகர் நட்டி நட்ராஜ் நடிப்பில் 'டிஎன் 2026' (TN 2026) என்ற திரைப்படம் வெளியானது. இந்தப் படத்தில் நட்டி நட்ராஜ், விஜய்யின் தோற்றத்தை நினைவூட்டும் வகையிலான கதாபாத்திரத்தில் நடித்திருந்தார். படம் கலவையான விமர்சனங்களைப் பெற்று வரும் நிலையில், நட்டி நட்ராஜ் தனது எக்ஸ் (X) தளத்தில் அரசியல் ரீதியான முக்கியப் பதிவு ஒன்றை வெளியிட்டுள்ளார்.

அதில், "நான் முழுமையாகத் தமிழக வெற்றிக் கழகத்தை ஆதரிக்கிறேன். விஜய்தான் அடுத்த முதல்வர். நம்பிக்கையாக இருங்கள்” எனக் குறிப்பிட்டுள்ளார். நட்டியின் இந்தப் பதிவு சமூக வலைதளங்களில் பெரும் விவாதத்தை ஏற்படுத்தியுள்ளது. தவெக தொண்டர்கள் மற்றும் விஜய் ரசிகர்கள் இதற்கு பலத்த ஆதரவு தெரிவித்து வரும் நிலையில், மற்ற கட்சியினர் விமர்சனங்களை முன்வைத்து வருகின்றனர். குறிப்பாக, தனது படத்தின் விளம்பரத்திற்காகவே நட்டி இத்தகைய கருத்தைப் பதிவிடுவதாகச் சமூக ஊடகங்களில் ஒரு தரப்பினர் கருத்துத் தெரிவித்து வருகின்றனர்.