பிரபல நடிகர் திலீப் ராஜ் மாரடைப்பால் மறைவு : கன்னடத் திரையுலகில் சோகம்!

கன்னடத் திரைத்துறை மற்றும் சின்னத்திரையில் பன்முகத் திறமையாளராக விளங்கிய நடிகர் மற்றும் தயாரிப்பாளர் திலீப் ராஜ் (47), இன்று அதிகாலை மாரடைப்பு காரணமாகத் திடீரென காலமானார்.

பெங்களூருவில் உள்ள தனது இல்லத்தில் இன்று அதிகாலை திலீப் ராஜிற்குத் திடீரென மாரடைப்பு ஏற்பட்டது. உடனடியாக அவர் சிகிச்சைக்காக அப்பல்லோ மருத்துவமனைக்குக் கொண்டு செல்லப்பட்டார். எனினும், அங்கு சிகிச்சை பலனின்றி அவர் உயிரிழந்ததாக மருத்துவர்கள் தெரிவித்துள்ளனர். 47 வயதே ஆன இவரது மறைவு கன்னடத் திரையுலகினரையும் ரசிகர்களையும் பெரும் அதிர்ச்சியில் ஆழ்த்தியுள்ளது.

நாடகத் துறையில் தனது கலைப் பயணத்தைத் தொடங்கிய திலீப் ராஜ், 'நடரங்கா' மற்றும் 'த்ரிஷ்டி' போன்ற புகழ்பெற்ற நாடகக் குழுக்களில் பணியாற்றித் தனது நடிப்புத் திறனை மெருகேற்றிக் கொண்டவர். 'கம்பட மனே' என்ற தொலைக்காட்சித் திரைப்படம் மூலம் அறிமுகமான இவர், ஜனனி, ரங்கோலி, குங்கும பாக்யா, மங்கல்யா, மலேபில்லு மற்றும் ரதசப்தமி போன்ற சூப்பர் ஹிட் தொடர்கள் மூலம் கர்நாடகத்தின் ஒவ்வொரு வீட்டிலும் அறிமுகமான முகமானார்.

நடிகராக மட்டுமன்றி, வெற்றிகரமான தயாரிப்பாளர், இயக்குனர் மற்றும் சிறந்த டப்பிங் கலைஞராகவும் முத்திரை பதித்தவர். யதார்த்தமான நடிப்பால் ரசிகர்களின் நன்மதிப்பைப் பெற்றவர். திலீப் ராஜின் மறைவுக்குக் கன்னடத் திரையுலகைச் சேர்ந்த முன்னணி நடிகர்கள், இயக்குனர்கள் மற்றும் சின்னத்திரை கலைஞர்கள் தங்களது ஆழ்ந்த இரங்கலைத் தெரிவித்து வருகின்றனர். அவரது உடல் பொதுமக்களின் அஞ்சலிக்காக வைக்கப்பட்டு, பின்னர் இறுதிச்சடங்குகள் நடைபெறும் என எதிர்பார்க்கப்படுகிறது.