பாஜகவுடன் பல பி டீம்கள் உள்ளனர்; கவனமாக வாக்களியுங்கள் - கனிமொழி எம்.பி. பிரச்சாரம்!

பாஜகவுடன் மறைமுகமாகப் பல 'பி' டீம்கள் செயல்பட்டு வருகின்றன. அவர்கள் திமுகவை மட்டுமே இலக்கு வைத்துப் பேசுவார்களே தவிர, மத்திய பாஜக அரசை எதிர்த்து ஒரு வார்த்தை கூடப் பேச மாட்டார்கள் என்று கனிமொழி எம்பி கூறினார்.

தமிழக சட்டப்பேரவைத் தேர்தலை முன்னிட்டு, மானாமதுரை தொகுதி திமுக வேட்பாளர் தமிழரசி ரவிக்குமாருக்கு ஆதரவாக திமுக எம்.பி. கனிமொழி இன்று தீவிரப் பிரசாரம் மேற்கொண்டார். அப்போது, தமிழக அரசியல் களத்தில் புதிதாகக் கட்சி தொடங்கியுள்ளவர்களையும், அதிமுகவையும் கடுமையாகச் சாடிப் பேசினார்.

பிரசாரத்தின் போது தமிழக வெற்றிக் கழகத் தலைவர் விஜய்யின் பெயரை நேரடியாகக் குறிப்பிடாமல், அவரைச் சுட்டிக்காட்டி கனிமொழி பேசியதாவது: "இந்தத் தேர்தலில் நாம் மிகவும் கவனமாக வாக்களிக்க வேண்டும். பாஜகவுடன் மறைமுகமாகப் பல 'பி' டீம்கள் (B-Teams) செயல்பட்டு வருகின்றன. அவர்கள் திமுகவை மட்டுமே இலக்கு வைத்துப் பேசுவார்களே தவிர, மத்திய பாஜக அரசை எதிர்த்து ஒரு வார்த்தை கூடப் பேச மாட்டார்கள். திமுகவை எதிர்ப்பதன் மூலம் தங்களுக்கு ஒரு பெருமையைத் தேடிக்கொள்ள அவர்கள் முயல்கிறார்கள்.

புதிதாகக் கட்சி தொடங்கியுள்ளவர்கள் மத்திய அரசு செய்யும் தவறுகளைத் தட்டிக்கேட்க மாட்டார்கள். அதேபோல், அதிமுகவின் செயல்பாடுகளையும் அவர்கள் விமர்சிப்பதில்லை. திமுகவை மீண்டும் மீண்டும் விமர்சிப்பதன் மூலம் அரசியல் லாபம் அடைய நினைப்பவர்களை மக்கள் நம்பி ஏமாற வேண்டாம். அவர்களுக்கு அளிக்கும் வாக்குகள் உங்கள் வாக்குகளை வீணாக்கக்கூடிய செயலாகும்.

தமிழகத்தில் பாஜகவின் கால் தடம் பதியாது, வரவிருக்கும் தேர்தலில் பாஜகவை இந்தத் தொகுதியில் நாம் வீழ்த்துவோம். தமிழகத்திலிருந்து பாஜகவுக்கு ஒரு பிடி மண் கூடக் கிடைக்காது என்றார்.