டெல்லிக்கு எதிராக 135 ரன்கள் குவிப்பு: கோலியின் சாதனையைச் சமன் செய்த அபிஷேக் சர்மா!

ஐபிஎல் தொடரின் டெல்லிக்கு எதிரான ஆட்டத்தில் சன்ரைசர்ஸ் ஹைதராபாத் அணியின் இளம் வீரர் அபிஷேக் சர்மா, டெல்லி கேப்பிடல்ஸ் அணியின் பந்துவீச்சை நாலாபுறமும் சிதறடித்து வரலாற்றுச் சாதனைகளைப் படைத்துள்ளார். அவரது அதிரடி சதத்தால் ஹைதராபாத் அணி 47 ரன்கள் வித்தியாசத்தில் அபார வெற்றி பெற்றது.

ஆட்டத்தின் தொடக்கம் முதலே அதிரடியைக் கட்டவிழ்த்து விட்ட அபிஷேக் சர்மா, வெறும் 68 பந்துகளில் 135 ரன்களை விளாசினார். இதில் 10 பவுண்டரிகள் மற்றும் 10 இமாலய சிக்ஸர்கள் அடங்கும். 198 என்ற ஸ்டிரைக் ரேட்டில் அவர் ஆடிய விதம் ரசிகர்களை வியப்பில் ஆழ்த்தியது.

விராட் கோலியின் சாதனை சமன்: டி20 கிரிக்கெட்டில் 9 சதங்கள் விளாசிய இரண்டாவது இந்திய வீரர் என்ற பெருமையை அபிஷேக் சர்மா பெற்றுள்ளார். இதன் மூலம் நட்சத்திர வீரர் விராட் கோலியின் சாதனையை அவர் சமன் செய்துள்ளார்.

கிறிஸ் கெயில் சாதனை முறியடிப்பு: டெல்லி அணிக்கு எதிராக ஐபிஎல் போட்டியில் ஒரு வீரர் எடுத்த அதிகபட்ச ரன்கள் (128 ரன்கள் - கிறிஸ் கெயில்) என்ற சாதனையை அபிஷேக் (135 ரன்கள்) முறியடித்துள்ளார்.

ஹைதராபாத் அணியின் முதல் வீரர்: டெல்லி கேப்பிடல்ஸ் அணிக்கு எதிராகச் சதம் விளாசிய முதல் சன்ரைசர்ஸ் ஹைதராபாத் வீரர் என்ற பெருமையை அவர் பெற்றுள்ளார்.

இந்திய வீரர்களில் முதலிடம்: ஐபிஎல் வரலாற்றில் ஒரே இன்னிங்ஸில் அதிக ரன்கள் விளாசிய இந்திய வீரர்களின் பட்டியலில் 141 ரன்கள் (கடந்த சீசன்) மற்றும் 135 ரன்கள் (இந்த சீசன்) எடுத்து முதல் இரண்டு இடங்களையும் அவரே பிடித்துள்ளார்.

நடப்புச் சீசனில் 7 இன்னிங்ஸ்களில் விளையாடியுள்ள அபிஷேக், 323 ரன்களுடன் அதிக ரன்கள் எடுத்த பேட்ஸ்மேன்களின் பட்டியலில் முதலிடத்தைப் பிடித்து ஆரஞ்சு தொப்பியைக் கைப்பற்றியுள்ளார். இதில் ஒரு சதம் மற்றும் இரண்டு அரைசதங்கள் அடங்கும்.

வெற்றிக்குப் பின் அபிஷேக் சர்மா உருக்கம்: ஆட்ட நாயகன் விருது வென்ற பின் அவர் "பயிற்சியாளர் மற்றும் கேப்டன் எனக்கு அளித்த முழுச் சுதந்திரமே எனது இயல்பான ஆட்டத்திற்கு முக்கியக் காரணம். மைதானத்தில் நான் காட்டும் 'L' சைகை, எங்களுக்கு ஆதரவளிக்கும் ரசிகர்களுக்கான எனது அன்பின் (Love) வெளிப்பாடு. குறிப்பாக, எனது பெற்றோர் முன்னிலையில் விளையாடிச் சாதனை படைத்தது மிகுந்த மகிழ்ச்சி அளிக்கிறது" என்று தெரிவித்தார்