எரிவாயு தட்டுப்பாடு: மும்பை, பெங்களூருவில் உணவகங்கள் மூடல் - பொதுமக்கள் அதிர்ச்சி!

மத்திய கிழக்கு நாடுகளின் போர்ச் சூழலால் ஏற்பட்டுள்ள எரிவாயு தட்டுப்பாடு காரணமாக, மும்பை, பெங்களூருவில் ஹோட்டல்கள் மற்றும் உணவகங்கள் மூடப்படும் என்று அறிவிக்கப்பட்டுள்ளது. 

வணிகப் பயன்பாட்டிற்கான 19 கிலோ எடை கொண்ட எல்.பி.ஜி (LPG) சிலிண்டர்களின் விநியோகம் திடீரென நிறுத்தப்பட்டுள்ளது. ஈரான் - இஸ்ரேல் இடையிலான போர் காரணமாக, வளைகுடா நாடுகளிலிருந்து கச்சா எண்ணெய் மற்றும் எரிவாயு இறக்குமதி கடுமையாகப் பாதிக்கப்பட்டுள்ளது.

வீட்டு உபயோக சிலிண்டர்களுக்கு அரசு முன்னுரிமை அளிப்பதால், வணிக ரீதியான சிலிண்டர் விநியோகத்தில் பெரும் தட்டுப்பாடு ஏற்பட்டுள்ளது. தினமும் ஹோட்டல்களைச் சார்ந்துள்ள மாணவர்கள், முதியவர்கள் மற்றும் வெளியூர் பயணிகள் கடும் சிரமத்திற்கு ஆளாவார்கள். ஆயிரக்கணக்கான ஹோட்டல் தொழிலாளர்களின் வாழ்வாதாரம் கேள்விக்குறியாகியுள்ளது.

நிலவும் தட்டுப்பாட்டைப் பயன்படுத்தி, சில இடங்களில் சிலிண்டர்கள் கறுப்புச் சந்தையில் அதிக விலைக்கு விற்பனை செய்யப்படுவதாக உரிமையாளர்கள் குற்றம் சாட்டியுள்ளனர். "அடுத்த 70 நாட்களுக்குத் தட்டுப்பாடு இருக்காது என்று எண்ணெய் நிறுவனங்கள் உறுதியளித்த நிலையில், திடீரென விநியோகத்தை நிறுத்தியது அதிர்ச்சியளிக்கிறது. மத்திய பெட்ரோலியத் துறை அமைச்சகம் உடனடியாகத் தலையிட்டு வணிக சிலிண்டர் விநியோகத்தைச் சீர்செய்ய வேண்டும்," என ஹோட்டல் உரிமையாளர்கள் சங்கம் கோரிக்கை விடுத்துள்ளது.

மும்பை: வணிக ரீதியிலான எல்.பி.ஜி (LPG) சிலிண்டர் தட்டுப்பாட்டினால் கடுமையாகப் பாதிக்கப்பட்டுள்ள ஹோட்டல் உரிமையாளர்கள் சங்கம், வரும் இரண்டு நாட்களில் மும்பையில் உள்ள ஏராளமான ஹோட்டல்கள் மற்றும் உணவகங்கள் தங்களது செயல்பாடுகளை நிறுத்த வேண்டிய நிலை ஏற்படும் என்று இன்று செவ்வாய்க்கிழமை தெரிவித்துள்ளது.