தென்காசியில் யாசகம் பெற்றவர் அடித்துக் கொலை : மர்ம நபர்கள் வெறிச்செயல்!

தென்காசியில் யாசகம் பெற்றவர் அடித்துக் கொலை செய்யப்பட்டது தொடர்பாக மர்ம நபர்களை போலீசார் தேடி வருகின்றனர். 

தென்காசி மேலப்புலியூரை சேர்ந்தவர் சங்கரநாராயணன் (53). இவர் பல்வேறு இடங்களில் யாசகம் பெற்று வந்தார். தென்காசி யானை பாலம் பகுதியில் உள்ள கோவில் மண்டபத்தில் தங்கி இருந்தார். நேற்று அவரது உடல் தலையில் பலத்த காயங்களுடன் கிடந்தது. இதுகுறித்து தென்காசி காவல் நிலையத்திற்கு தகவல் தெரிவிக்கப்பட்டது.  இன்ஸ்பெக்டர் பாலமுருகன் மற்றும் போலீசார் சம்பவ இடத்திற்கு விரைந்து சென்று சங்கரநாராயணன் உடலை கைப்பற்றி பிரேத பரிசோதனைக்காக தென்காசி அரசு மருத்துவமனைக்கு  அனுப்பி வைத்தனர். 

போலீசார் விசாரணை நடத்தியதில்,  சங்கரநாராயணன் பிணமாக கிடந்த இடத்திலும், அவர் மீதும் கற்களால் செய்யப்பட்ட சாமி சிலைகள் கிடந்தது. இதனால் மர்ம நபர்கள் சாமி சிலைகளால் தாக்கி சங்கரநாராயணனை கொலை செய்தது தெரியவந்தது. அவரை கொலை செய்த மர்ம நபர்கள் யார்? எதற்காக சாமி சிலைகளை வைத்து அடித்து கொன்றனர்? என்பது உடனடியாக தெரியவில்லை. இது குறித்து போலீசார் வழக்கு பதிவு செய்து தீவிர விசாரணை மேற்கொண்டு மர்ம நபர்களை வலைவீசி தேடி வருகின்றனர்.