மதுபோதை தகராறில் வாலிபர் சரமாரியாக வெட்டிக்கொலை : நண்பர்கள் வெறிச்செயல்

கல்லிடைக்குறிச்சியில் வாலிபர் சரமாரியாக வெட்டிக்கொலை செய்யப்பட்டார். இதுதொடர்பாக தலைமறைவான நண்பர்கள் 3 பேரை போலீசார் வலைவீசி தேடி வருகின்றனர்.

நெல்லை மாவட்டம் கல்லிடைக்குறிச்சி அகஸ்தியர் கோவில் சன்னதி தெருவைச் சேர்ந்தவர் பூதத்தான். இவருடைய மகன் பிரபு (31). கூலி தொழிலாளியான இவருக்கு திருமணமாகவில்லை. கல்லிடைக்குறிச்சி புது அம்மன் கோவில் தெருவைச் சேர்ந்தவர் கண்ணன் மகன் மாயாண்டி (29), கூலி தொழிலாளி. நண்பர்களான இவர்கள் 2 பேரும் நேற்று மதியம் அப்பகுதியில் புதிதாக கட்டப்பட்டு வந்த வீட்டின் வளாகத்தில் மது குடிக்க சென்றனர். 

அப்போது அவர்கள் தங்களுடன் சக நண்பர்கள் 2 பேரையும் மது குடிக்க அழைத்து சென்றனர். பிரபு, மாயாண்டி உள்ளிட்ட 4 பேரும் மது அருந்தியபோது, அவர்களுக்கு இடையே திடீரென்று தகராறு ஏற்பட்டது. அப்போது ஆத்திரமடைந்த மாயாண்டி உள்ளிட்ட 3 பேரும் சேர்ந்து அரிவாளால் பிரபுவை சரமாரியாக வெட்டியதாக கூறப்படுகிறது. இதில் தலை, கழுத்து உள்ளிட்ட இடங்களில் பலத்த வெட்டுக்காயம் அடைந்த அவர் ரத்த வெள்ளத்தில் துடிதுடித்து சம்பவ இடத்திலேயே பரிதாபமாக இறந்தார். பின்னர் மாயாண்டி உள்ளிட்ட 3 பேரும் தப்பி சென்றனர்.