200 ஆண்டு பழமைவாய்ந்த மாமரத்தை வெட்டிய அதிகாரிகள்: பக்தர்கள் கடும் எதிர்ப்பு

ஸ்ரீவைகுண்டம் கள்ளபிரான் சுவாமி கோவில் வளாகத்தில் இருந்த 200 ஆண்டு பழமைவாய்ந்த மாமரத்தை அதிகாரிகள் வெட்டினர். இதற்கு பக்தர்கள் எதிர்ப்பு தெரிவித்தால் பரபரப்பு ஏற்பட்டது.

தூத்துக்குடி மாவட்டத்தில் உள்ள நவதிருப்பதி கோவில்களில் முதலாவது தலமாக ஸ்ரீவைகுண்டம் கள்ளபிரான் சுவாமி கோவில் உள்ளது. இந்த கோவில் வளாகத்தின் உட்பிரகாரத்தில் சொர்க்கவாசலுக்கு அருகே சுமார் 200 ஆண்டுகளுக்கு மேலாக பழமைவாய்ந்த 2 மாமரங்கள் அடர்ந்து வளர்ந்து நின்றது. அதில் ஒரு மரத்தின் கிளையானது கடந்த சில மாதங்களுக்கு முன்பு பலத்த காற்றில் முறிந்து விழுந்து விட்டது. 

இந்நிலையில் அந்த மாமரங்களை வெட்டி அகற்றுவதற்கு அதிகாரிகள் முடிவு செய்து நேற்று காலை மரத்தை வெட்டும் பணிகளை தொடங்கினர். ஒரு மாமரத்தின் கிளைகள் முழுவதும் வெட்டி அகற்றப்பட்டது. இதை அறிந்த பா.ஜ.க. மற்றும் இந்து முன்னணி நிர்வாகிகளான முத்துராமலிங்கம், சித்திரைவேல், ஸ்ரீரங்கன், கோபால், காசிராமன், மணிகண்டன் மற்றும் பக்தர்கள் கோவிலுக்கு திரண்டு வந்து, பழமைவாய்ந்த மரத்தை வெட்டக்கூடாது என்று எதிர்ப்பு தெரிவித்தனர். இதனால் அங்கு பரபரப்பு ஏற்பட்டது.

மேலும் பழமையான மரத்தை வெட்டிய இந்து சமய அறநிலையத்துறை அதிகாரிகள் மீது நடவடிக்கை எடுக்க வேண்டும் என்று வலியுறுத்தி ஸ்ரீவைகுண்டம் போலீஸ் நிலையத்தில் புகார் மனுவும் கொடுத்தனர். இதையடுத்து போலீஸ் சப்-இன்ஸ்பெக்டர் ராஜா ராபர்ட் மற்றும் போலீசார் கோவிலுக்கு சென்று உரிய அனுமதி இன்றி மரத்தை வெட்டக்கூடாது என்று கூறி அதற்கு தடை விதித்தனர். இதனால் மரத்தை வெட்டும் பணி அப்படியே நிறுத்தப்பட்டது. அதன்பிறகே பக்தர்கள் நிம்மதி அடைந்தனர்.