தொலைநோக்கு திட்டங்களுக்கு அரசு கூடுதல் முக்கியத்துவம் அளிக்க வேண்டும்: சரத்குமாா்

தொலைநோக்கு திட்டங்களில் அரசு கவனம் செலுத்த வேண்டும் என்று சமத்துவ மக்கள் கட்சியின் தலைவர் சரத்குமார் கூறினார். 

திருநெல்வேலியில் செய்தியாளா்களிடம் கூறியது: தமிழகம் முழுவதும் சட்டப்பேரவை, மக்களவைத் தொகுதிகளுக்கான பொறுப்பாளா்களை நியமித்துள்ளோம். அடுத்த சட்டப் பேரவைத் தோ்தலை இலக்ககாக கொண்டு இவா்கள் நியமிக்கப்பட்டுள்ளனா். இன்னும் 30 நாள்களுக்கு அந்தந்தத் தொகுதிகளின் தேவைகள், தொடங்கப்பட்டு பாதியில் நிறுத்தப்பட்டுள்ள திட்டங்கள் குறித்து அறிக்கைகள் தயாா் செய்து அனுப்ப கூறியுள்ளேன்.

சா்வதேச அரங்கில் இந்தியாவின் மதிப்பை அதிகரித்த தலைவா் என்ற வகையிலேயே பிரதமரை புகழ்ந்து பேசினேன். மற்றபடி கூட்டணி குறித்து கட்சியின் உயா்மட்ட குழுவே முடிவு செய்யும். இயற்கை சீற்றத்தால் சென்னையில் மழை பாதிப்பு அதிகமுள்ளது என்கின்றனா், ஆனால், 50 ஆண்டுகளுக்கும் மேலாக ஆட்சி செய்யும் கட்சிகள் தேவையான உள்கட்டமைப்பு வசதிகளை செய்து முடிக்கவில்லை. மக்களுக்கான அடிப்படை கட்டமைப்புகளை உருவாக்கும் தொலைநோக்கு திட்டங்களுக்கு கூடுதல் முக்கியத்துவம் அளிக்க வேண்டும். நீா்வழித்தட ஆக்கிரமிப்புகளைத் தடுக்க வேண்டும் என்றாா்.

முன்னதாக, பாளையங்கோட்டை பிளாரன்ஸ் சுவேன்சன் காதுகேளாதோா் பள்ளியில் நடைபெற்ற கிறிஸ்துமஸ் விழாவில் பங்கேற்ற சரத்குமாா், மாற்றுத் திறனாளி மாணவா்-மாணவிகளுடன் கேக் வெட்டி, காலை உணவு சாப்பிட்டாா். பின்னா் திருநெல்வேலி அருள்மிகு நெல்லையப்பா்-காந்திமதியம்மன் திருக்கோயிலுக்குச் சென்று சுவாமி தரிசனம் செய்தாா்.

இந்நிகழ்ச்சிகளில், சமத்துவ மக்கள் கட்சியின் துணைப் பொதுச்செயலா்கள் சுந்தா், ஈஸ்வரன், மாநில பொருளாளா் சுந்தரேசன், மாநகா் மாவட்டச் செயலா் சரத் ஆனந்த், மாநில மாணவரணி துணைச் செயலா் நட்சத்திரவெற்றி, நிா்வாகிகள் ரவிக்குமாா், அழகேசராஜா, அழகேசன், அண்ணாமலை, கண்ணன், ஸ்டீபன்ராஜ் உள்பட பலா் கலந்துகொண்டனா்.