இரட்டை ரயில் பாதை பணிகள் தொடங்கியது: பிப்.29- வரை போக்குவரத்து மாற்றம்

நெல்லை-மேலப்பாளையம் இடையே இரட்டை ரயில் பாதை அமைக்கும் பணி தொடங்கியதையடுத்து வருகிற 29-ம் தேதி வரை போக்குவரத்து மாற்றம் செய்யப்பட்டுள்ளது.

சென்னை முதல் கன்னியாகுமரி வரை இரட்டை ரயில் பாதை அமைக்கும் பணி பல ஆண்டுகளுக்கு முன்பு தொடங்கப்பட்டது. தற்போது இறுதி கட்டமாக மதுரை -தூத்துக்குடி இடையேயும், வாஞ்சிமணியாச்சியில் இருந்து நெல்லை வழியாக நாகர்கோவில் வரையிலும் மேற்கொள்ளப்பட்டது. இதில் மதுரை -நெல்லை இடையே இரட்டை ரயில் பாதை அமைக்கப்பட்டு போக்குவரத்து நடைபெற்று வருகிறது.

நெல்லை -நாகர்கோவில் இடையே உள்ள வழித்தடத்தில் மேலப்பாளையத்தில் இருந்து நாங்குநேரி, வள்ளியூர், பணகுடி, காவல்கிணறு, ஆரல்வாய்மொழி வரை 56 கிலோ மீட்டர் தூரத்துக்கு ரயில் பாதை அமைக்கப்பட்டு கடந்த ஆண்டு முதல் இருமார்க்கத்திலும் போக்குவரத்து நடைபெற்று வருகிறது. மீதமுள்ள ஆரல்வாய்மொழி -நாகர்கோவில் இடையே 13 கிலோ மீட்டர், மேலப்பாளையம் -நெல்லை சந்திப்பு இடையே 3 கிலோ மீட்டர் தூரம் வரை பாதை அமைக்கும் பணி மட்டும் முடிக்காமல் இருந்தது.

இந்த நிலையில் நேற்று மேலப்பாளையத்தில் இருந்து நெல்லை சந்திப்பு ரயில் நிலையத்திற்கு இரட்டை ரயில் பாதை அமைக்கும் பணி நேற்று தொடங்கியது. இதன் காரணமாக சில ரயில்கள் போக்குவரத்து மாற்றம் செய்யப்பட்டு உள்ளன. நேற்று செங்கோட்டை- நெல்லை பயணிகள் ரயில் சேரன்மாதேவி வரை மட்டுமே இயக்கப்பட்டது. மறுமார்க்கத்தில் இருந்து நெல்லை- செங்கோட்டை ரயில் நெல்லையில் இருந்து புறப்படுவதற்கு பதிலாக சேரன்மாதேவியில் இருந்து புறப்பட்டது.

இன்றும் செங்கோட்டையில் இருந்து நெல்லைக்கு வரும் பயணிகள் ரயில் (06684, 06658) சேரன்மாதேவி வரை மட்டுமே இயக்கப்படும். நெல்லையில் இருந்து செங்கோட்டை செல்லும் ரயில்கள் (06687, 06657) நெல்லைக்கு பதிலாக சேரன்மாதேவியில் இருந்து செங்கோட்டைக்கு இயக்கப்படும். இந்த ரயில் பாதை அமைக்கும் பணிகள் வருகிற 29-ம் தேதி வரை நடைபெறுவதால் அன்று வரை இந்த போக்குவரத்து மாற்றம் இருக்கும் என்று தெற்கு ரயில்வே சார்பில் தெரிவிக்கப்பட்டு உள்ளது.