ஆடுகள் இழப்பிற்கான இழப்பீடு நிதியுதவி: ஆட்சியர் சுகுமார் வழங்கினார்

மக்கள் குறை தீர்க்கும் நாள் கூட்டத்தில் 5 பயனாளிகளுக்கு ஆடுகள் இழப்பிற்கான இழப்பீடு நிதியுதவி மற்றும் 5 பயனாளிகளுக்கு நலவாரிய அட்டைகளை மாவட்ட ஆட்சியர் சுகுமார் வழங்கினார்.

திருநெல்வேலி மாவட்ட ஆட்சியர் அலுவலகத்தில் இன்று (28.04.2025) நடைபெற்ற மக்கள் குறை தீர்க்கும் நாள் கூட்டத்தில் கால்நடை பராமரிப்புத்துறை சார்பில் 05 பயனாளிகளுக்கு ரூ.2.80 இலட்சம் மதிப்பில் ஆடுகள் இழப்பிற்கான இழப்பீடு நிதியுதவியினை மாவட்ட ஆட்சியர் சுகுமார், வழங்கினார்.

இக்கூட்டத்தில், பொதுமக்களின் கோரிக்கையின் தன்மைக்கேற்ப மனுக்கள் பதிவு செய்யப்பட்டதோடு, அம்மனுக்களை சம்மந்தப்பட்ட துறை அலுவலர்களிடம் அளிக்கும் வகையிலும், முக்கிய கோரிக்கைகள் மற்றும் பொது பிரச்சனைகள் தொடர்பான மனுக்களை மாவட்ட ஆட்சியர் அவர்களிடம் அளிப்பதற்கான வசதிகளும் செய்யப்பட்டுள்ளது. இம்மனுக்களை சம்மந்தப்பட்ட துறை அலுவலர்களிடம் ஒப்படைத்து மனுக்களை பரிசீலனை செய்ய உரிய நடவடிக்கை எடுக்குமாறு மாவட்ட ஆட்சியர் உத்தரவிட்டார். 

மேலும் முதலமைச்சரின் தனிப்பிரிவுகள் மனுக்கள் மீது தனிக்கவனம் செலுத்தி நடவடிக்கை எடுக்குமாறு அலுவலர்களுக்கு அறிவுறுத்தினார். மக்கள் குறைதீர்க்கும் நாள் கூட்டத்தில் வெறிநாய் கடித்ததால் 47 ஆடுகள் உயிரிழந்தது. உயிரிழந்த ஆடுகளின் உரிமையாளர்கள் 05 பயனாளிகளுக்கு முதலமைச்சரின் நிவாரண தொகை ரூ.2.82 இலட்சத்திற்கான காசோலைகளையும் மற்றும் பிற்படுத்தப்பட்டோர் நலத்துறையின் சார்பில் 05 பயனாளிகளுக்கு நல வாரிய அட்டைகளையும் மாவட்ட ஆட்சியர் சுகுமார் வழங்கினார்.

இந்நிகழ்வில் மாவட்ட ஊரக வளர்ச்சி முகமை திட்ட இயக்குநர் சரவணன், தனித்துணை ஆட்சியர் (நதிநீர் இணைப்பு திட்டம்) சண்முகசுந்தர், தனித்துணை ஆட்சியர் (ச.பா.தி) ஜெயா , உட்பட துறைசார்ந்த அலுவலர்கள் பலர் கலந்து கொண்டார்கள்.