நெல்லையப்பர் கோயில் ஆனித்திருவிழா தேரோட்டம்: திருநெல்வேலியில் கோலாகலம்

தென் தமிழ்நாட்டில் வற்றாது வளங்கொழிக்கும் தாமிரபரணி என வழங்கும் தண்பொருநை ஆற்றின் பாங்காய் அமைந்துள்ளது திருநெல்வேலி என்னும் புண்ணியதலம். இது, பாண்டி நாட்டில் பதினான்கு பாடல்பெற்ற சிவத்திருத் தலங்களில் ஒன்றாகும். வேதபட்டர், இறைவனுக்குத் திருவமுது ஆக்குவதற்கு காயப்போட்டிருந்த நெல் மழையினால் நனையாதபடி வேலியிட்டுக் காத்த சிறப்புடையதும். 

அகத்திய முனிவருக்கு திருமணக் கோலம் காட்டிய மேன்மையுடையதும், தாருகாவனத்து முனிவர்கள் செருக்கினை அடக்கிய புகழை உடையதும், பால்குடம் சுமர்ந்து சென்ற இராமக்கோன் என்ற அன்பரை இறைவன் மூங்கில் வடிவாக இருந்து இடறிவிட்டு பாலை தன்மேல் கவிழச் செய்து அதனால் வெட்டுண்டு காட்சியருளிய பெருமையுடையதும், திக்கெல்லாம் புகழுறும் திருநெல்வேலி என்று திருஞானசம்பந்தரால் பாடப்பெற்ற பெருமையுடையதும் ஆகிய பற்பல சிறப்புக்கள் நிறைந்த இப்புண்ணியதலத்தில் கோயில் கொண்டு எழுந்தருளியிருக்கும் திரிபுரம் எரித்த விரிசடைக் கடவுளாகிய சிவபெருமான் உயிர்களின் மூவகைக் கட்டுகளாகிய அரவணங்களைத் தகர்த்தெறிந்த செயலை விளக்குவதாகிய திரிபுரம் எரித்த வரலாற்றின்படி அப்போது தேர் ஏறி வந்த திருக்கோலத்தை நினைவூட்டிக் காட்டுவதாகிய தேர்த் திருவிழா அருள்மிகு சுவாமி நெல்லையப்பர் அருள்தரும் காந்திமதி அம்மன் திருக்கோவில் ஆனி பெரும்தேரோட்டத் திருவிழா கடந்த 30-ம் தேதி கொடியேற்றத்துடன் தொடங்கியது. விழா நாட்களில் காலையும், மாலையும் பல்வேறு வாகனங்களில் சுவாமி, அம்பாள் வீதியுலா நடைபெற்று வந்தது.

இந்நிகழ்ச்சியில் இந்து சமய அறநிலையத்துறை அமைச்சர் பி.கே.சேகர்பாபு செய்தியாளர்களிடம் தெரிவித்ததாவது: திருநெல்வேலி அருள்மிகு சுவாமி நெல்லையப்பர், அருள்தரும் காந்திமதி அம்மன் திருக்கோயில் தேரோட்ட திருவிழா பக்தர்கள் முழக்கத்துடன் வெகு விமர்சையாக நடைபெற்று வருகிறது. இன்று 519 வது தேரோட்ட திருவிழாவில் கலந்து கொண்டு சுவாமி தேரினை வடம் பிடித்து தொடங்கி வைத்ததில் மகிழ்ச்சி அடைகிறேன். ஆசியாவிலே மூன்றாவது பெரிய திருத்தேர் அருள்மிகு சுவாமி நெல்லையப்பர் திருத்தேராகும். ரூ.59 இலட்சம் செலவில் புதியதாக ஸ்ரீசண்டிகேஸ்வரர் திருத்தேர் செய்யப்பட்டுள்ளது. ரூ.6.50 இலட்சம் மதிப்பில் சுவாமி மற்றும் அம்பாள் தேருக்கு புதியதாக 6 வடகயிறுகள் கொள்முதல் செய்யப்பட்டுள்ளது.

ரூ.43 இலட்சம் மதிப்பில் சுவாமி தேர், விநாயகர் தேர், சுப்பிரமணியர் தேர் மற்றும் சண்டிகேஸ்வரர் தேருக்கு புதியதாக மரக்குதிரை, மர பிரம்மா, அம்பாள் தேருக்கு மரத்தினால் பிரம்மா மற்றும் மர யாழியும் செய்யப்பட்டுள்ளது. ரூ.5.54 இலட்சம் மதிப்பில் விநாயகர் தேருக்கு புதியதாக இரும்பு சக்கரம் செய்யப்பட்டு பொருத்தப்பட்டுள்ளது. ரூ.9.92 இலட்சம் மதிப்பில் சுவாமித்தேர், அம்பாள் தேர், விநாயகர் தேர், சுப்பிரமணியர் தேர் மற்றும் சண்டிகேஸ்வரர் தேருக்கு புதியதாக தேர் துணி கொள்முதல் செய்யப்பட்டுள்ளது. 

ரூ.37.60 இலட்சம் செலவில் புதிய திருத்தேர் கொட்டகைகள். ரூ.1.43 கோடி மதிப்பில் அம்மன் சன்னதி மேற்கூரையில் தட்டோடு பதிக்கும் பணிகள் நிறைவடைந்துள்ளது. ரூ.99 இலட்சம் மதிப்பில் அம்மன் சன்னதி வளாகத்தில் இரண்டாம் பிரகாரம் கல்மண்டபம் புதுப்பிக்கும் பணிகள் நிறைவடைந்துள்ளது. ரூ.32.60 இலட்சம் மதிப்பில் பக்தர்களின் பொருட்களை பாதுகாக்கும் வகையில் பொருட்கள் வைப்பறை, மற்றும் காலணிகள் பாதுகாப்பகம். ரூ.14.70 இலட்சம் மதிப்பில் புதிய கழிவறைகள், ரூ.1.60 கோடி மதிப்பில் கருஉருமாறி தீர்த்தக்குளம் புனரமைக்கும் பணிகள் (40% நிறைவு). சட்டமன்ற அறிவிப்பின்படி, ரூ.5 கோடி செலவில் 450 கிலோ வெள்ளியை கொண்டு புதிய வெள்ளித்தேர். ரூ.35 இலட்சம் செலவில் வெள்ளித்தேருக்கான மரத்தேர் பணி நிறைவு. வரும் அக்டோபர் 2025 -க்குள் வெள்ளோட்டம்.

ரூ.1.80 கோடி மதிப்பில் புதியதாக ஓதுவார் பயிற்சி பள்ளிக்கு சுற்றுச்சுவர். கட்டடம், சமையல் அறை மற்றும் ரூ.5.25 கோடி மதிப்பில் மூத்த குடிமக்கள் உறைவிடம் கட்டும் பணி தமிழ்நாடு முதலமைச்சர் அவர்களால் 27.05.2025 அன்று தொடங்கி வைக்கப்பட்டது. ஸ்ரீ காந்தி அம்பாள் மகளிர் மேல்நிலைப்பள்ளி விடுதி 100 மாணவிகளுக்கு கட்டணமில்லாமல் உணவு உறைவிடம். திருவிழா நாட்களில் அன்னதான திட்டம் தினசரி 100 நபர்களில் இருந்து 500 நபர்களுக்கு உயர்வு, ரூ.30 இலட்சம் மதிப்பில் இத்திருக்கோயில் பாதுகாப்பினை பலப்படுத்தும் வகையில் புதிய கண்காணிப்பு கேமராக்கள் மற்றும் மெட்டல் டிடெக்டர் கருவிகள் பொருத்தப்பட்டுள்ளது என இந்து சமய அறநிலையத்துறை அமைச்சர் பி.கே.சேகர்பாபு தெரிவித்தார்.