பட்டப்பகலில் வாலிபர் ஓடஓட விரட்டி வெட்டிக்கொலை: இருவர் வெறிச்செயல் - உறவினர்கள் மறியல்!

தூத்துக்குடி மாவட்டம் சாத்தான்குளம் காந்திநகர் பகுதியை சேர்ந்தவர் கருப்பசாமி. இவரது மகன் சுடலை முத்து (25). கூலி தொழிலாளி. இவர் இன்று காலை 10:30 மணி அளவில் அங்குள்ள ஒரு சினிமா தியேட்டர் முன்பு நின்று நண்பருடன் பேசிக்கொண்டிருந்தார். அப்போது பைக்கில் வந்த 2பேர் அவரை ஓட ஓட விரட்டி அரிவாளால் சரமாரியாக வெட்டிக் கொலை செய்துவிட்டு தப்பிச் சென்றுவிட்டனர். 

இதனிடையே சுடலைமுத்துவின் உறவினர்கள், அவரது உடலை எடுக்க விடாமல் சாலை மறியல் போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது. உடனடியாக குற்றவாளிகளை கைது செய்ய வேண்டும். அதுவரை உடலை அங்கிருந்து எடுக்க கூடாது என கோஷங்கள் எழுப்பினர்.

சம்பவ இடத்திற்கு சாத்தான்குளம் (பொறுப்பு) டி.எஸ்.பி. ராமச்சந்திரன், திருச்செந்தூர் டி.எஸ்.பி. மகேஷ்குமார், இன்ஸ்பெக்டர் ஸ்டீபன் ராமச்சந்திரன் ஆகியோர் போராட்டத்தில் ஈடுபட்ட சுடலைமுத்துவின் உறவினர்களிடம் பேச்சுவார்த்தையில் ஈடுபட்டனர். உடனடியாக குற்றவாளிகள் கைது செய்யப்படுவார்கள் என்று போலீஸ் அதிகாரிகள் உறுதி அளித்ததை தொடர்ந்து உறவினர்கள் அங்கிருந்து கலைந்து சென்றனர்.

சாத்தான்குளம் பகுதியில் பதுங்கி இருந்த கொலையாளிகள் இருவரையும் சாத்தான்குளம் தனிப்படை போலீசார் கைது செய்துள்ளனர். தொடர்ந்து அவர்களிடம் போலீசார் விசாரணை நடத்தி வருகின்றனர் தூத்துக்குடி மாவட்ட எஸ்பி ஆல்பர்ட் ஜான் சம்பவ இடம் வந்து பார்வையிட்டு மேல்விசாரணை நடத்தினர். இந்த சம்பவம் தொடர்பாக பிரச்சனை இருந்ததால் திருச்செந்தூர் டிஎஸ்பி மகேஷ் குமார், தட்டார் மடம் இன்ஸ்பெக்டர் வேலம்மாள், மெஞ்ஞானபுரம் இன்ஸ்பெக்டர் இசக்கிதுரை, நாசரேத் இன்ஸ்பெக்டர் வனசுந்தர் மற்றும் போலீசார் குவிக்கப்பட்டனர்.