தூத்துக்குடியில் மருந்து வணிகர்கள் கடையடைப்பு போராட்டம் - மாவட்டத்தில் 450 மருந்தகங்கள் மூடல்!

ஆன்லைன் மருந்து விற்பனையை முற்றிலுமாகத் தடை செய்ய வலியுறுத்தி தூத்துக்குடி மாவட்ட மருந்து வணிகர்கள் சங்கம் சார்பில் இன்று மாவட்டம் முழுவதும் மருந்தகங்கள் பெருமளவில் மூடப்பட்டுள்ளது. 

ஆன்லைன் மருந்து விற்பனையை முற்றிலும் தடை செய்ய வேண்டும். வலி நிவாரணி மற்றும் தூக்க மாத்திரைகளை ஆன்லைனில் முறையற்ற முறையில் விற்பனை செய்வதைத் தடுக்க வேண்டும். புற்றுநோய், இதய நோய் போன்ற உயிர்காக்கும் மருந்துகளைத் தரமற்ற முறையில், காலாவதியான மருந்துகளை விற்று மக்கள் உயிரோடு விளையாடும் கார்ப்பரேட் நிறுவனங்கள் மீது கடும் நடவடிக்கை எடுக்க வேண்டும் என வலியுறுத்தி நாடு முழுவதும்  மருந்து வணிகர்கள் கடையடைப்பு போராட்டம் நடத்தி வருகின்றனர். 

இதன்படி தூத்துக்குடி மாவட்டம் முழுவதும் மொத்தம் 450 மருந்து கடைகள் அடைக்கப்பட்டுள்ளன. தூத்துக்குடி மாநகர எல்லைக்குட்பட்ட பிரதான வணிகப் பகுதிகளில் உள்ள மற்றும் மருத்துவமனைகளின் அருகாமையில் அமைந்துள்ள சுமார் 150 மருந்து கடைகள் தங்களது விற்பனையை முற்றிலுமாக நிறுத்திப் போராட்டத்திற்கு முழு ஆதரவு அளித்துள்ளன.

கோவில்பட்டி, சாத்தான்குளம், திருச்செந்தூர், விளாத்திகுளம், உடன்குடி மற்றும் புதுக்கோட்டை உள்ளிட்ட மாவட்டத்தின் பிற உள்கட்டமைப்பு வட்டாரங்களிலும் மீதமுள்ள 300-க்கும் மேற்பட்ட கடைகள் முழுமையாக அடைக்கப்பட்டுள்ளதால், வணிகர்கள் சங்கத்தின் இந்த அறப்போராட்டம் மாவட்டத்தில் 100% முழு வெற்றியடைந்துள்ளது என மாவட்டத் தலைவர் ஜான்பிரிட்டோ மற்றும் செயலாளர் முனுசாமி ஆகியோர் தெரிவித்துள்ளனர்.