நீட் தேர்வை காங்கிரஸ் கட்சி எதிர்க்கிறது: மூத்த நிர்வாகி செல்லக்குமார் பேட்டி!

தூத்துக்குடியில் செய்தியாளர்களைச் சந்தித்த காங்கிரஸ் அகில இந்திய செயலாளர் செல்லக்குமார் விடுத்த அறிக்கையில், தமிழகத்தில் மீண்டும் பெருந்தலைவர் காமராஜர் ஆட்சியை அமைக்க விரும்புவதாகத் தெரிவித்தார். இதற்காகக் காங்கிரஸ் கட்சி சார்பில் 'லஞ்சம் தவிர், நெஞ்சம் நிமிர்' என்ற புதிய கொள்கை முழக்கத்தை முன்னிறுத்தி மக்கள் மத்தியில் தீவிரப் பிரச்சாரம் மேற்கொண்டு வருவதாகக் குறிப்பிட்டார்.

மருத்துவக் கல்லூரி நீட் தேர்வை காங்கிரஸ் கட்சி முழுமையாக எதிர்க்கிறது எனத் தெரிவித்த அவர், நீட் தேர்வுக்கான தனியார் பயிற்சி நிலையங்கள் வினாத்தாள்களை சட்டத்திற்குப் புறம்பாக விற்பனை செய்து கோடிக்கணக்கில் லாபம் ஈட்டி வருவதாகக் குற்றம் சாட்டினார். இத்தகைய முறைகேடான தேர்வு முறையினால் ஆண்டுதோறும் அனிதா போன்ற பல ஏழை மாணவர்களின் உயிர்களை நாம் இழந்து வருகிறோம் என வேதனை தெரிவித்தார்.

பாதிக்கப்படும் மாணவர்களின் தற்போதைய நிலை குறித்து உத்தரகாண்ட் மாநிலத்தில் காங்கிரஸ் தலைவர் ராகுல் காந்தி நேரில் கலந்துரையாடியதைச் சுட்டிக்காட்டிய செல்லக்குமார், இந்த நீட் தேர்வு ஒழிப்பை வலியுறுத்தித் தூத்துக்குடி மாநகர் மாவட்ட காங்கிரஸ் தலைவர் சகாயராஜ் ஏற்பாட்டில் நகரில் பிரம்மாண்ட மினி மரத்தான் போட்டி வெற்றிகரமாக நடத்தப்பட்டுள்ளதாகக் கூறினார். பேட்டியின் போது இந்நிகழ்வில் தூத்துக்குடி மாவட்ட காங்கிரஸ் முக்கிய நிர்வாகிகள் பலர் கலந்து கொண்டனர்.