சாத்தான்குளம் வழக்கில் 9 போலீசார் தூக்குத் தண்டனை : உயர்நீதிமன்றத்தில் மேல்முறையீடு விசாரணை தொடக்கம்!

சாத்தான்குளம் தந்தை-மகன் மரண வழக்கில் 9 போலீசாருக்கு விதிக்கப்பட்ட தூக்குத் தண்டனைக்கு எதிரான மேல்முறையீட்டு மனுக்கள் மீதான நாளாந்த விசாரணை மதுரை உயர்நீதிமன்றக் கிளையில் தொடங்கியது.

தூத்துக்குடி மாவட்டம் சாத்தான்குளத்தைச் சேர்ந்த ஜெயராஜ், இவரது மகன் பென்னிக்ஸ் ஆகிய இருவரையும் கடந்த 2020-ஆம் ஆண்டில் விசாரணை என்ற பெயரில் காவல்துறையினர் கடுமையாகத் தாக்கினர். அதில் படுகாயமடைந்த இருவரும் அடுத்தடுத்து பரிதாபமாக உயிரிழந்தனர்.

இச் சம்பவம் தொடர்பாகச் சாத்தான்குளம் காவல் நிலையத்தில் அப்போது ஆய்வாளராக (இன்ஸ்பெக்டர்) இருந்த ஸ்ரீதர், உதவி ஆய்வாளர்கள் (சப்-இன்ஸ்பெக்டர்) பாலகிருஷ்ணன், ரகு கணேஷ் உட்பட 9 போலீசார் கைது செய்யப்பட்டு மதுரை மத்திய சிறையில் அடைக்கப்பட்டனர். வழக்க விசாரித்த மதுரை மாவட்டக் நீதிமன்றம், குற்றம் சாட்டப்பட்ட 9 போலீசாருக்கும் தூக்குத் தண்டனை விதித்துத் தீர்ப்பளித்தது.

விதிக்கப்பட்ட தூக்குத் தண்டனையை உயர்நீதிமன்றம் உறுதிப்படுத்த வேண்டும் எனச் சி.பி.ஐ. சார்பில் மதுரை உயர்நீதிமன்றக் கிளையில் மனுத் தாக்கல் செய்யப்பட்டது. அதேபோல் தூக்குத் தண்டனை பெற்ற 9 போலீசாரும் தண்டனையை எதிர்த்து மேல்முறையீட்டு மனுத் தாக்கல் செய்தனர்.

இவ் வழக்கின் விசாரணை நீதிபதிகள் ஜெகதீஷ் சந்திரா, பூர்ணிமா ஆகியோர் அடங்கிய அமர்வு முன்பு நேற்று விசாரணைக்கு வந்தது. அப்போது சிறையிலிருந்த 9 போலீசாரும் வீடியோ கான்பரன்சிங் (Video Conferencing) மூலம் நீதிபதிகள் முன்பாக ஆஜர்ப்படுத்தப்பட்டனர்.

அப்போது சி.பி.ஐ. வழக்கறிஞர் முத்துசரவணன் ஆஜராகி, சாத்தான்குளம் காவல் நிலையத்தில் தந்தை, மகன் இருவரையும் போலீசார் கொடூரமாகத் தாக்கியதாலேயே உயிரிழந்தனர் என்றும், ஆனால் அக் குற்றத்தை மறைக்க இறப்பைத் திசைதிருப்பும் முயற்சியில் காவல்துறையினர் ஈடுபட்டனர் என்றும் வாதாடினார். பல முக்கியச் சாட்சியங்களை உறுதிப்படுத்திய பின்னரே கீழமை நீதிமன்றம் இக் கொடூரச் செயலில் ஈடுபட்டவர்களுக்குத் தூக்குத் தண்டனை விதித்துள்ளதைச் சுட்டிக்காட்டினார்.

இவ் வாதங்களைப் பதிவு செய்து கொண்ட நீதிபதிகள், வழக்கின் விசாரணையை இன்றைய தினத்திற்கு ஒத்திவைத்தனர். மேல்முறையீட்டு மனுக்கள் மீதான விசாரணை இனி வரும் நாட்களில் தினமும் தொடர்ந்து நடைபெறும் என நீதிபதிகள் அமர்வு அதிகாரப்பூர்வமாகத் தெரிவித்துள்ளது.