நெல்லை, குமரி, தூத்துக்குடி மாவட்டங்களில் டிச. 9ல் கனமழை வாய்ப்பு!

நெல்லை, குமரி, தூத்துக்குடி மாவட்டங்களில் சனிக்கிழமை (டிச. 9) பலத்த மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

இது குறித்து வானிலை ஆய்வு மையத்தின் தென்மண்டலத் தலைவர் எஸ்.பாலசந்திரன் கூறியது: வங்கக் கடலில் நிலைகொண்டிருந்த தீவிர புயலான மிக்ஜம் தெற்கு ஆந்திர கடலோரப் பகுதியான பாபட்லாவுக்கு தெற்கே கரையைக் கடந்தது. நேற்று செவ்வாய்க்கிழமை பிற்பகல் 12.30 மணியளவில் கரையைக் கடக்கத் தொடங்கிய புயல், பிற்பகல் 2.30 மணியளவில் முழுவதுமாக கரையைக் கடந்தது. மேலும் இது வடதிசையில் நகர்ந்து படிப்படியாக வலுவிழக்கக்கூடும்.

மிக்ஜம் புயல் காரணமாக திங்கள்கிழமை (டிச. 5) சென்னை, காஞ்சிபுரம், திருவள்ளூர் உள்ளிட்ட மாவட்டங்களில் 14 இடங்களில் அதிபலத்த மழையும், 29 இடங்களில் மிக பலத்த மழையும், 15 இடங்களில் பலத்த மழையும் பதிவாகியுள்ளது. அதிகபட்சமாக பூந்தமல்லியில் 340 மி.மீ. மழை பதிவாகியுள்ளது.

தமிழகம், புதுச்சேரி, காரைக்கால் பகுதிகளில் புதன்கிழமை முதல் திங்கள்கிழமை (டிச. 6-11) வரை ஓரிரு இடங்களில் லேசானது முதல் மிதமானது வரை மழை பெய்யக்கூடும். குறிப்பாக, சனிக்கிழமை (டிச. 9) கன்னியாகுமரி, திருநெல்வேலி, தென்காசி, தூத்துக்குடி, கோயம்பத்தூர் மாவட்ட மலைப் பகுதிகள் நீலகிரி, தேனி, திண்டுக்கல் மாவட்டங்களில் பலத்த மழை பெய்ய வாய்ப்புள்ளது.

சென்னை மற்றும் புறநகர் பகுதிகளுகளில் புதன்கிழமை (டிச. 6) வானம் மேகமூட்டத்துடன் காணப்படும். நகரின் ஒருசில பகுதிகளில் லேசானது முதல் மிதமான வரை மழை பெய்யக்கூடும் என்றார்.