இல்லத்தரசிகளுக்கான கூப்பன் திட்டம்: மக்களே முடிவு செய்யும் சுதந்திரம் - கனிமொழி விளக்கம்

எதை வாங்க வேண்டும் என்பதை மக்களே முடிவு செய்யும் சுதந்திரம் இல்லத்தரசிகளுக்கான கூப்பன் திட்டத்தில் உள்ளது என்று கனிமொழி எம்பி விளக்கமளித்தார்.

திமுகவின் தேர்தல் அறிக்கை என்பது வெறும் வாக்குறுதிகள் அல்ல; அவை நிறைவேற்றப்படக் கூடிய சாத்தியக்கூறுகளை ஆராய்ந்து உருவாக்கப்பட்ட மக்கள் நலத் திட்டங்கள் என்று திமுக துணைப் பொதுச் செயலாளரும், தேர்தல் அறிக்கை தயாரிப்புக் குழுத் தலைவருமான கனிமொழி கருணாநிதி எம்.பி. தெரிவித்துள்ளார்.

சென்னை அண்ணா அறிவாலயத்தில் செய்தியாளர்களைச் சந்தித்த அவர், தமிழக அரசின் சாதனைகள் மற்றும் புதிய தேர்தல் அறிக்கையின் சிறப்பம்சங்கள் குறித்து விரிவாக விளக்கினார். கடந்த சட்டமன்றத் தேர்தலின் போது திமுக வழங்கிய 505 வாக்குறுதிகளில் 404 திட்டங்கள் முழுமையாக நிறைவேற்றப்பட்டுள்ளன. இதுமட்டுமின்றி, தேர்தல் அறிக்கையில் இடம்பெறாத காலை உணவுத் திட்டம், ‘மக்களைத் தேடி மருத்துவம்’ போன்ற மகத்தான திட்டங்களையும் முதலமைச்சர் மு.க. ஸ்டாலின் செயல்படுத்தியுள்ளார்.

மீதமுள்ள வாக்குறுதிகள் குறித்து விளக்கிய அவர்: ஒன்றிய அரசின் ஒத்துழைப்பு தேவைப்படுவதால் 37 வாக்குறுதிகள் நிலுவையில் உள்ளன. உள்ளூர் மக்களின் எதிர்ப்பு மற்றும் நடைமுறைச் சிக்கல்கள் காரணமாக 64 திட்டங்கள் பரிசீலனையில் உள்ளன.  நடப்பு தேர்தல் அறிக்கையில் மகளிருக்கான உரிமைகளை நிலைநாட்டும் வகையில் பல முக்கிய அம்சங்கள் இடம்பெற்றுள்ளன. 

குறிப்பாக:மகளிர் பெயரில் சொத்துப் பதிவு செய்யப்பட்டால் முத்திரைத் தாள் கட்டணத்தில் 1% குறைப்பு. உள்ளாட்சி அமைப்புகளில் மாற்றுத் திறனாளிகளுக்கு உரியப் பிரதிநிதித்துவம். ‘தமிழ்ப் புதல்வன்’, ‘புதுமைப் பெண்’, ‘நான் முதல்வன்’ மற்றும் ‘தாயுமானவர்’ போன்ற கல்வி மற்றும் வாழ்வாதாரத் திட்டங்கள்.

இந்தத் தேர்தல் அறிக்கை குறித்து கனிமொழி எம்.பி. கூறுகையில், "எங்கள் குழுவினர் தமிழகம் முழுவதும் சுற்றுப்பயணம் செய்து மக்களிடம் நேரடியாக மனுக்களைப் பெற்றனர். மேலும் ஏஐ (AI), மின்னஞ்சல், வாட்ஸ்அப் மற்றும் குறுஞ்செய்திகள் வாயிலாகப் பெறப்பட்ட சுமார் 80 ஆயிரம் கருத்துகளை ஒருங்கிணைத்து, துறை சார்ந்த வல்லுநர்களுடன் ஆலோசித்து இந்த அறிக்கை தயாரிக்கப்பட்டுள்ளது," என்றார்.

அதிமுகவின் விமர்சனங்களுக்குப் பதில்

அதிமுகவின் தேர்தல் அறிக்கையை திமுக காப்பி அடித்ததாகக் கூறப்படும் குற்றச்சாட்டிற்குப் பதிலளித்த அவர்: "உண்மையைச் சொல்லப்போனால், அதிமுகவின் தேர்தல் அறிக்கையைப் படிக்க வேண்டிய அவசியம் எங்களுக்கு இல்லை. நடைமுறையில் என்ன திட்டங்கள் இருக்கின்றன என்பதே தெரியாமல் அவர்கள் அறிக்கை தயாரித்துள்ளனர். மகளிர் உரிமைத் தொகையை 2,000 ரூபாயாக உயர்த்துவோம் என முதலமைச்சர் அறிவித்த பிறகு, அவர்களும் அதையே சொல்வது வேடிக்கையாக உள்ளது. பொள்ளாச்சி பாலியல் வன்கொடுமை வழக்கில் குற்றவாளிகளைக் காப்பாற்ற முயன்றவர்களுக்குப் பெண்களின் பாதுகாப்பு குறித்துப் பேச எந்த அருகதையும் இல்லை."

சமையலறைப் பணிகளில் இருந்து பெண்களுக்கு விடுதலையும், கூடுதல் நேரமும் கிடைக்க வேண்டும் என்பதே இத்திட்டத்தின் நோக்கம் என அவர் குறிப்பிட்டார். "மறைந்த தலைவர் கலைஞர் அவர்கள் இரண்டு பர்னர் அடுப்புகளை வழங்கியதன் நோக்கம் பெண்கள் சமையலறையில் செலவிடும் நேரத்தைக் குறைக்க வேண்டும் என்பதே. அதேபோல், இக்கூப்பன் மூலம் வாஷிங் மெஷின், பிரிட்ஜ் போன்ற வீட்டு உபயோகப் பொருட்களை வாங்குவதன் மூலம் பெண்களின் வேலைப்பளு குறையும். எதை வாங்க வேண்டும் என்பதை மக்களே முடிவு செய்யும் சுதந்திரம் இதில் உள்ளது," என்று அவர் விளக்கமளித்தார்.