ஜனாதிபதி விருந்தில் நடிகை பிரியங்கா மோகன்: தென் கொரிய அதிபருடன் சந்திப்பு!

தென் கொரிய அதிபருக்கு ஜனாதிபதி மாளிகையில் அளிக்கப்பட்ட அரசு விருந்தில், 'மேட் இன் கொரியா' பட நாயகி பிரியங்கா மோகன் சிறப்பு விருந்தினராகப் பங்கேற்றார். 

இந்தியாவுக்கு மூன்று நாள் அரசு முறைப் பயணமாக வருகை தந்துள்ள தென் கொரிய அதிபர் லீ ஜே மியுங்-ஐ கௌரவிக்கும் விதமாக, ஜனாதிபதி மாளிகையில் பிரம்மாண்ட விருந்து நிகழ்ச்சி நடைபெற்றது. ஜனாதிபதி திரவுபதி முர்மு அளித்த இந்த உயர்மட்ட விருந்தில், இந்தியத் திரைத்துறையின் பிரதிநிதியாக நடிகை பிரியங்கா மோகன் பங்கேற்றுச் சிறப்பித்தார்.

சமீபத்தில் நெட்பிளிக்ஸில் வெளியாகி உலகளாவிய சாதனைகளைப் படைத்த 'மேட் இன் கொரியா' திரைப்படத்தின் பிரம்மாண்ட வெற்றியைக் கொண்டாடும் விதமாகப் பிரியங்கா மோகனுக்கு இந்தச் சிறப்பு அழைப்பு விடுக்கப்பட்டது. கடந்த மாதம் 12-ம் தேதி வெளியான இப்படம், மூன்றே வாரங்களில் 1.35 கோடிப் பார்வைகளைக் கடந்து, ஆங்கிலம் அல்லாத உலகளாவியத் திரைப்படங்கள் பிரிவில் முதலிடம் பிடித்தது.

இந்தப் படத்தின் பெரும்பகுதி தென் கொரியாவில் படமாக்கப்பட்டதால், இரு நாடுகளுக்கு இடையிலான கலை மற்றும் கலாச்சாரத் தொடர்பைப் பிரதிபலிக்கும் வகையில் இந்தப் பங்கேற்பு அமைந்தது. இந்த கௌரவம் குறித்துத் தனது இன்ஸ்டாகிராம் பக்கத்தில் பதிவிட்டுள்ள பிரியங்கா மோகன்: "ராஷ்டிரபதி பவனில் இது ஒரு மறக்க முடியாத மாலைப்பொழுது. ஜனாதிபதி திரவுபதி முர்மு அவர்கள் அளித்த விருந்தில், பிரதமர் நரேந்திர மோடி மற்றும் தென் கொரிய அதிபர் லீ ஜே மியுங் ஆகியோரது முன்னிலையில் கலந்து கொண்டதை மிகப் பெரும் பெருமையாகக் கருதுகிறேன்," எனத் தெரிவித்துள்ளார்.

இந்த விருந்து நிகழ்ச்சியில் பிரதமர் நரேந்திர மோடி, மத்திய அமைச்சர்கள் மற்றும் இரு நாடுகளைச் சேர்ந்த முக்கியத் தூதரக அதிகாரிகள் கலந்து கொண்டனர். உலக அளவில் இந்தியத் திரைத்துறையின் வளர்ச்சியை அங்கீகரிக்கும் ஒரு நிகழ்வாக இது பார்க்கப்படுகிறது.