போலீஸ் வாகனம் மோதி இந்திய மாணவி பலி : ரூ.265 கோடி இழப்பீடு வழங்க உத்தரவு!

அமெரிக்காவில் காவல் துறை வாகனம் மோதி உயிரிழந்த இந்திய மாணவி ஜாஹ்னவி கண்டுலாவின் குடும்பத்தினருக்கு, 31.5 மில்லியன் டாலர் (சுமார் ரூ.265 கோடி) இழப்பீடு வழங்க சியாட்டில் நகர நிர்வாகம் ஒப்புதல் அளித்துள்ளது.

கடந்த 2023-ஆம் ஆண்டு ஜனவரி 23-ஆம் தேதி, வாஷிங்டன் மாகாணம் சியாட்டில் நகரில் உள்ள 'நார்த் ஈஸ்டர்ன்' பல்கலைக்கழகத்தில் மேற்படிப்பு படித்து வந்த ஆந்திர மாநிலத்தைச் சேர்ந்த ஜாஹ்னவி கண்டுலா (23), சாலையைக் கடக்க முயன்றார். அப்போது, அதிவேகமாக வந்த போலீஸ் ரோந்து வாகனம் அவர் மீது மோதியதில், ஜாஹ்னவி சுமார் 100 அடி தூரத்திற்குத் தூக்கி வீசப்பட்டு சம்பவ இடத்திலேயே உயிரிழந்தார்.

விசாரணையில், போலீஸ் அதிகாரி கெவின் டேவ் என்பவர் வாகனத்தை மணிக்கு 100 கிலோ மீட்டருக்கும் அதிகமான வேகத்தில் ஓட்டி வந்தது உறுதி செய்யப்பட்டது. மேலும்: அதிவேகமாகச் சென்றபோது பாதசாரிகளை எச்சரிக்கும் சைரன் ஒலிக்கப்படவில்லை.

வாகனத்தின் முகப்பு விளக்குகள் (Headlights) முறையாக ஒளிரவிடப்படவில்லை. இதனால் சாலையைக் கடந்த மாணவியால் வாகனத்தின் வருகையைக் கணிக்க முடியாமல் போனதே இந்த விபத்துக்கு முக்கிய காரணமாகச் சொல்லப்படுகிறது.

இந்த விபத்து தொடர்பாகச் சியாட்டில் போலீஸார் வெளியிட்ட கண்காணிப்புக் கேமரா காட்சிகள் பெரும் அதிர்வலைகளை ஏற்படுத்தின. விபத்து நடந்த பிறகு, மற்றொரு காவல் அதிகாரி டேனியல் ஆபரர், மாணவியின் மரணத்தை மிகவும் அலட்சியமான முறையில் கிண்டல் செய்து சிரித்தபடி பேசியது 'பாடி கேமராவில்' (Body Cam) பதிவாகியிருந்தது. இது சர்வதேச அளவில் கடும் கண்டனங்களைப் பெற்றது. இதனைத் தொடர்ந்து சம்பந்தப்பட்ட அதிகாரி மீது துறை ரீதியான ஒழுங்கு நடவடிக்கை எடுக்கப்பட்டது.

ஜாஹ்னவியின் மரணம் ஈடு செய்ய முடியாதது என்றும், இந்த இழப்பீடு அவரது குடும்பத்தினருக்குச் சிறிய ஆறுதலாக அமையும் என்றும் இந்தத் தீர்ப்பில் தெரிவிக்கப்பட்டுள்ளது. முன்னதாக, விபத்தை ஏற்படுத்திய அதிகாரி மீது போதிய கிரிமினல் நடவடிக்கை எடுக்கப்படவில்லை என ஜாஹ்னவியின் குடும்பத்தினர் அதிருப்தி தெரிவித்திருந்தனர். இந்நிலையில், இந்த மெகா இழப்பீட்டுத் தொகை வழங்கச் சியாட்டில் நகர சபை தற்போது ஒப்புதல் அளித்துள்ளது.