திருநெல்வேலியில் விண்வெளி தொழில்நுட்ப காட்சி அரங்கம்: ஆட்சியர் திறந்து வைத்தார்!

திருநெல்வேலி மாவட்ட அறிவியல் மையத்தில் விண்வெளி தொழில்நுட்ப காட்சி அரங்கத்தினை மாவட்ட ஆட்சியர் கார்த்திகேயன் திறந்து வைத்தார்.

திருநெல்வேலி கொக்கிரகுளம் பகுதியில் அமைந்துள்ள மாவட்ட அறிவியல் மையத்தில் பொதுமக்கள் மாணவர்கள் விண்வெளி குறித்து தெரிந்து கொள்ளும் வகையில் ரூ.40 இலட்சம் மதிப்பீட்டில் புதியதாக உருவாக்கப்பட்ட விண்வெளி தொழில்நுட்ப காட்சி அரங்கத்தினை மாவட்ட ஆட்சியர் கார்த்திகேயன், தென் மண்டல அறிவியல் தொழில்நுட்ப அருங்காட்சியக இயக்குனர் சஜூபாஸ்கரன் முன்னிலையில் இன்று (07.11.2024) திறந்து வைத்து பார்வையிட்டார்.

நாடு முழுவதும் ஒன்றிய அரசின் கீழ் 27 மாவட்ட அறிவியல் மையங்கள் செயல்பட்டு வருகின்றன. தென் மண்டலத்தில் மட்டும் தமிழகத்தின் நெல்லை மாவட்ட அறிவியல் மையம் உள்பட ஐந்து மையங்கள் செயல்பட்டு வருகிறது. நெல்லை மாவட்ட அறிவியல் மையத்தில் அறிவியல் மற்றும் விஞ்ஞான பூர்வமான செய்திகளை தெரிந்து கொள்ளும் வகையில் ஏராளமான பொருட்கள் வைக்கப்பட்டு, சிறப்பாக இயங்கி வருகிறது.

பொதுமக்கள் மற்றும் மாணவர்கள் விண்வெளி குறித்து அறிந்து கொள்ளும் வகையில் விண்வெளி தொழில்நுட்ப காட்சி அரங்கம் ரூ.40 இலட்சம் மதிப்பில் அமைக்கப்பட்டுள்ளது. இந்த அரங்கில் விண்வெளியில் செயற்கை கோள் செயல்படும் விதம், விண்வெளிக்கு செல்லும் மனித மாதிரி, விண்வெளி மைய செயல்பாடுகள், ராக்கெட் பற்றிய குறிப்புகள் ஆகியவற்றை அறிந்து கொள்ளும் வகையில் நவீன தொழில்நுட்பத்துடன் அமைக்கப்பட்டுள்ளது. இதுபோன்ற விண்வெளி தொழில்நுட்ப காட்சி அரங்கம் பெங்களூர் விஸ்வேஸ்வரய்ய அருங்காட்சியகத்தில் உள்ளது. இரண்டாவதாக நெல்லை அறிவியல் மையத்தில் அமைக்கப்பட்டுள்ளது.

இந்நிகழ்வில், அண்ணா பல்கலைக்கழக முதல்வர் செண்பக விநாயக மூர்த்தி, அறிவியல் மைய ஒருங்கிணைப்பாளர் நவ ராம்குமார், மாவட்ட அறிவியல் மைய அலுவலர் முத்துகுமார் மற்றும் மாணவ மாணவிகள் பலர் கலந்து கொண்டனர்.