டி20 உலகக் கோப்பை: இலங்கையை வீழ்த்தி ஜிம்பாப்வே அதிரடி வெற்றி - புள்ளிப்பட்டியலில் முதலிடம்!

கொழும்பில் நடைபெற்ற இப்போட்டியில் டாஸ் வென்ற இலங்கை அணி முதலில் பேட்டிங்கைத் தேர்வு செய்தது. தொடக்க வீரர் பதும் நிசங்கா அதிரடியாக விளையாடி 41 பந்துகளில் 62 ரன்கள் (8 பவுண்டரிகள்) குவித்து வலுவான அடித்தளம் அமைத்துக் கொடுத்தார். அவருக்குத் துணையாக பவன் ரத்நாயகே 44 ரன்களும், குசல் பெரேரா 22 ரன்களும் எடுக்க, இலங்கை அணி 20 ஓவர் முடிவில் 7 விக்கெட் இழப்பிற்கு 178 ரன்கள் சேர்த்தது.

ஜிம்பாப்வே தரப்பில் முசராபானி, பிராட் ஈவன்ஸ் மற்றும் கிரீம் கிரெமர் தலா 2 விக்கெட்டுகளை வீழ்த்தினர். 179 ரன்கள் என்ற கடினமான இலக்கை நோக்கிப் பயணித்த ஜிம்பாப்வே அணிக்குத் தொடக்க வீரர்கள் பிரையன் பென்னட் மற்றும் மருமானி (34 ரன்கள்) ஜோடி 69 ரன்கள் சேர்த்துச் சிறப்பான தொடக்கம் தந்தனர்.

நடுகளத்தில் களம் புகுந்த கேப்டன் சிக்கந்தர் ராஸா, ஆட்டத்தின் போக்கை மாற்றினார். அவர் 26 பந்துகளில் 45 ரன்கள் (4 சிக்ஸர்கள், 2 பவுண்டரிகள்) விளாசி இலங்கையின் பந்துவீச்சைச் சிதறடித்தார். மறுமுனையில் நங்கூரமாக நின்ற பிரையன் பென்னட் 48 பந்துகளில் 63 ரன்கள் எடுத்து இறுதிவரை ஆட்டமிழக்காமல் அணியின் வெற்றியை உறுதி செய்தார். ஜிம்பாப்வே அணி 19.3 ஓவர்களிலேயே 4 விக்கெட்டுகளை மட்டும் இழந்து இலக்கை எட்டியது.

இந்த வெற்றியின் மூலம் ஜிம்பாப்வே அணி 'குரூப் பி' பிரிவில் விளையாடிய அனைத்துப் போட்டிகளிலும் தோல்வியுறாமல் 7 புள்ளிகளுடன் முதலிடத்தைப் பிடித்துள்ளது. ஓமன், ஆஸ்திரேலியா மற்றும் இலங்கையை வீழ்த்திய ஜிம்பாப்வே, அயர்லாந்துக்கு எதிரான போட்டி மழையினால் ரத்தானதால் ஒரு புள்ளியைப் பகிர்ந்து கொண்டது. அதிரடி ஆட்டத்தை வெளிப்படுத்திய ஜிம்பாப்வே கேப்டன் சிக்கந்தர் ராஸா ஆட்டநாயகனாகத் தேர்ந்தெடுக்கப்பட்டார்.