அடுத்த பொதுத்தேர்தலில் போட்டி : புதிய அரசியல்... புதிய பாதை! – அண்ணாமலை அறிவிப்பு!

தமிழகத்தின் அடுத்த பொதுத்தேர்தலில் தமது புதிய கட்சி நேரடியாகப் போட்டியிடும் என்று அண்ணாமலை அறிவித்துள்ளார்.

பாரதிய ஜனதா கட்சியின் அடிப்படை உறுப்பினர் பதவியிலிருந்து அதிகாரப்பூர்வமாக விலகியுள்ள தமிழக பாஜக முன்னாள் மாநிலத் தலைவர் கே. அண்ணாமலை, தமிழ்நாட்டை அடிப்படையாகக் கொண்டு, இளைஞர்களை மையப்படுத்திய புதிய அரசியல் இயக்கத்தை இன்று முறைப்படி அறிவித்துள்ளார். தமிழகத்தின் அரசியல் மொழி மற்றும் இலக்கணத்தை மாற்றி, வரும் அடுத்த பொதுத்தேர்தலில் தமது புதிய கட்சி நேரடியாகப் போட்டியிடும் என்றும் அவர் அதிரடியாகப் பிரகடனம் செய்துள்ளார்.

கடந்த சட்டசபை தேர்தலுக்குச் சில மாதங்களுக்கு முன்பு அண்ணாமலை மாநிலத்தலைவர் பொறுப்பிலிருந்து நீக்கப்பட்டார். அதனைத் தொடர்ந்து நயினார் நாகேந்திரன் தலைமையில் தேர்தலைச் சந்தித்த பாஜக, அதிமுக கூட்டணியில் 27 இடங்களைப் பெற்று ஒரேயொரு தொகுதியில் மட்டுமே வென்றது. நட்சத்திர வேட்பாளர்கள் அனைவரும் தோல்வியைத் தழுவிய நிலையில், அக்கட்சியின் வாக்கு வங்கியும் சரிந்தது.

இந்தச் சூழலில், கடந்த சில தினங்களாக டெல்லியில் முகாமிட்டு உள்துறை அமைச்சர் அமித்ஷா, தேசிய பொதுச்செயலாளர் பி.எல்.சந்தோஷ் மற்றும் தேசியத் தலைவர் நிதின் நபின் ஆகியோரைச் சந்தித்து ஐந்து பக்கக் கடிதத்தை அண்ணாமலை அளித்திருந்தார். இந்நிலையில், அண்ணாமலையின் ராஜினாமாவை பாஜக தேசியத் தலைமை இன்று முறைப்படி ஏற்றுக்கொண்டதாகத் தேசியப் பொதுச்செயலாளர் அருண் சிங் அதிகாரப்பூர்வ அறிக்கையில் தெரிவித்துள்ளார்.

தனது விலகலை அடுத்து அண்ணாமலை வெளியிட்டுள்ள வீடியோ பதிவில், பாஜக மேலிடத்துடன் கடந்த 18 மாதங்களாகக் கடுமையான கருத்து வேறுபாடு நீடித்ததாகப் பகிரங்கமாகக் குற்றம் சாட்டியுள்ளார்.

"என்னுடைய மாற்றுத் திறனாய்வுக் கருத்துகளுக்கு பாஜக தலைமை செவிசாய்க்கவில்லை. தேசியக் கட்சிகளின் மொழி தமிழ்நாடு மக்களுக்கு ஒருபோதும் புரிவதில்லை. பாஜகவில் இருந்த 6 ஆண்டுகளில் தமிழ்நாட்டின் உரிமைகளை நான் ஒருபோதும் விட்டுக்கொடுத்ததில்லை. தமிழ்நாட்டின் அடையாளத்தோடுதான் அந்தத் தேசியக் கட்சி இருக்க வேண்டும் என விரும்பினேன், ஆனால் அது சாத்தியப்படவில்லை.

கடந்த 2020ஆம் ஆண்டு நான் பாஜகவில் இணைவதற்கு ஒரு நாள் முன்பு, சூப்பர்ஸ்டார் ரஜினிகாந்திடமிருந்து அவரது இயக்கத்தில் இணைய அழைப்பு வந்தது. ஆனால் மூன்று முக்கியக் காரணங்களுக்காக அதை மறுத்துவிட்டுத்தான் பாஜகவில் இணைந்தேன். தற்போது அடிப்படை அரசியல் கட்டமைப்பை மாற்ற வேண்டிய நேரம் வந்துவிட்டதால், எனது தனித்துவமான பாதையைத் தேர்வு செய்துள்ளேன்."

தாம் தொடங்கவுள்ள புதிய இயக்கம் 'மதசார்பற்ற கொள்கை' கொண்டதாகவும், தமிழ்நாட்டின் தற்போதைய 'Cult Politics' (தனிநபர் வழிபாட்டு அரசியல்) கலாச்சாரத்திலிருந்து முற்றிலுமாக விடுபட்டதாகவும் இருக்கும் என அவர் குறிப்பிட்டுள்ளார். "நமது இயக்கத்தில் நிரந்தரத் தலைவர், நிரந்தர எம்பி, எம்எல்ஏ என்று எவரும் கிடையாது. 'மாறுவோம்... மாற்றுவோம்' என்பதே கொள்கை" என்று முழங்கியுள்ளார்.

மேலும், சிறந்த மூளைகளை அரசியலுக்குக் கொண்டு வரும் நோக்கில், 'அப்துல்கலாம் சென்டர் பார் எத்திக்ஸ் அண்ட் பாலிட்டிக்ஸ்' (Abdul Kalam Center for Ethics & Politics) என்ற பெயரில் புதிய அரசியல் பயிற்சி மையம் உருவாக்கப்பட்டு, முறையான பயிற்சிக்குப் பின் இந்த இயக்கம் சரியான நேரத்தில் முழுமையான அரசியல் கட்சியாக மாற்றப்படும் என்றும், இனி திமுக, அதிமுகவைப்போலவே பாஜகவையும் தான் சமமாகப் பார்க்கப் போவதாகவும் அண்ணாமலை பதிவு செய்துள்ளார்.

புதிய அறிவிப்பை வெளியிட்ட கையோடு, தனது புதிய இயக்கத்திற்கான அதிகாரப்பூர்வ உறுப்பினர் சேர்க்கையையும் அண்ணாமலை உடனே தொடங்கியுள்ளார். 'இது நம்ம இயக்கம்' என்ற பெயரில் பொதுமக்கள் மற்றும் இளைஞர்கள் தங்களை உறுப்பினர்களாக இணைத்துக் கொள்ள ஏதுவாக, [https://wetheleader.org/](https://wetheleader.org/) என்ற அதிகாரப்பூர்வ இணையதள முகவரியையும் அவர் பகிர்ந்துள்ளார். 

இந்த இணையதளம் தொடங்கப்பட்ட சில மணி நேரங்களிலேயே, இதுவரை 4லட்சம் பேர் அண்ணாமலையின் புதிய இயக்கத்தில் தங்களை உறுப்பினர்களாக இணைத்துக் கொண்டுள்ளனர் என்று தகவல்கள் வெளியாகியுள்ளன. அண்ணாமலையின் இந்த அதிரடித் தனிக்கட்சிப் பிரகடனம் ஒட்டுமொத்தத் தமிழக அரசியல் வட்டாரத்திலும், பிராந்தியத் தேர்தல் களத்திலும் பெரும் அதிர்வலைகளையும் பரபரப்பையும் ஏற்றியுள்ளது.