தமிழக அரசு வழங்கிய வீட்டுமனைகள் ஆக்கிரமித்து விற்பனை: ஆட்சியரிடம் பொதுமக்கள் மனு!

கோவில்பட்டியில் தமிழக அரசு வழங்கிய வீட்டுமனைகள் ஆக்கிரமித்து விற்பனை செய்யப்படுவதாக தூத்துக்குடி மாவட்ட ஆட்சியரிடம் பொதுமக்கள் முறையிட்டு மனு அளித்தனர். 

தூத்துக்குடி மாவட்டம், கோவில்பட்டி வட்டம், இலுப்பையூரணி ஊராட்சியில் தமிழக அரசு 118 பேருக்கு இலவச வீட்டு மனைகளை வழங்கி உள்ளது. அந்த நிலத்தை கோவில்பட்டி வட்டாட்சியர் அளந்து கல் நாட்டிய பிறகு தனிநபர் ஆக்கிரமித்து விற்பனை செய்து வருவதாகவும், இதுகுறித்து தகவல் அறிந்து பட்டாக்களை பெற்ற பயனாளர்கள் சென்ற போது தங்களை ஆக்கிரமிப்பாளர்கள் மிரட்டி விரட்டுவதாகவும், எனவே இது குறித்து உரிய நடவடிக்கை எடுக்க வலியுறுத்தி, பொதுமக்கள், கட்சி நிர்வாகிகள் மாவட்ட ஆட்சியர் இளம்பகவத்தை நேரில் சந்தித்து கோரிக்கை மனு அளித்தனர்.

அதில், தமிழக அரசு வழங்கிய இலவச வீட்டு மனைகளை அளவீடு செய்து கல் நாட்டப்பட்ட இடங்களை மீட்டு உரிய பயனாளிகளுக்கே வழங்க நடவடிக்கை எடுக்க வேண்டும், என்று மனுவில் கோரிக்கை விடுத்து உள்ளனர். 

மூவேந்தர் மருத முன்னேற்றக் கழக நிறுவனத் தலைவர் அன்பரசு, மாவட்ட செயலாளர் பேச்சிமுத்து, மாவட்ட இளைஞரணி செயலாளர் பால்துரை, மாவட்ட மகளிர் அணி செயலாளர் மணி மற்றும் நிர்வாகிகள் ஒன்றிய செயலாளர் பொன்மாடசாமி, மகளிர் அணி செயலாளர் முத்துலட்சுமி உட்பட நிலப்பட்டா பெற்ற பயனாளர்கள் உள்பட பலர் கலந்து கொண்டு கொண்டனர்.