சட்டமன்றத் தேர்தல்: மார்ச் 10 முதல் த.வெ.க வேட்பாளர்களுடன் விஜய் நேர்காணல்!

தமிழக வெற்றிக் கழகம் சார்பில் வரும் சட்டமன்றத் தேர்தலில் போட்டியிட விருப்பமனு அளித்தவர்களுடன், அக்கட்சியின் தலைவர் விஜய் வரும் மார்ச் 10-ஆம் தேதி முதல் நேர்காணல் நடத்த உள்ளார்.

தமிழகத்தில் 2026-ஆம் ஆண்டு நடைபெறவுள்ள சட்டமன்றத் தேர்தலை எதிர்கொள்ளத் தமிழக வெற்றிக் கழகம் தீவிரமாகத் தயாராகி வருகிறது. இதன் ஒரு பகுதியாக, கட்சியின் சார்பில் போட்டியிட விரும்புவோரிடமிருந்து கடந்த பிப்ரவரி 6-ஆம் தேதி முதல் பிப்ரவரி 20-ஆம் தேதி வரை விருப்பமனுக்கள் பெறப்பட்டன. 234 தொகுதிகளுக்கும் ஏராளமான நிர்வாகிகள் மற்றும் தொண்டர்கள் ஆர்வத்துடன் மனுத் தாக்கல் செய்திருந்தனர்.

இந்நிலையில், பெறப்பட்ட விருப்பமனுக்களைப் பரிசீலனை செய்த கட்சித் தலைமை, முதற்கட்டமாக உத்தேச வேட்பாளர் பட்டியலைத் தயார் செய்துள்ளது. இந்தப் பட்டியலில் இடம்பெற்றுள்ளவர்களுடன் வரும் மார்ச் 10-ஆம் தேதி முதல் சென்னை பனையூரில் உள்ள கட்சித் தலைமை அலுவலகத்தில் நேர்காணல் நடைபெறவுள்ளது. கட்சித் தலைவர் விஜய் நேரடியாக இந்த நேர்காணலை நடத்தி, வேட்பாளர்களின் தகுதி, வெற்றி வாய்ப்பு மற்றும் தொகுதி நிலவரம் குறித்துக் கேட்டறிய உள்ளார்.

தமிழகம், புதுச்சேரி உள்ளிட்ட மாநிலங்களில் ஏப்ரல் மாதத்தில் தேர்தல் நடைபெற வாய்ப்புள்ளதாகக் கருதப்படும் நிலையில், மார்ச் மாத நடுப்பகுதியில் தேர்தல் குறித்த அறிவிப்பு வெளியாகலாம் என்று எதிர்பார்க்கப்படுகிறது. இதைக் கருத்தில் கொண்டு, மற்ற பிரதான கட்சிகளுக்கு முன்னதாகவே வேட்பாளர்களை இறுதி செய்யும் பணிகளில் த.வெ.க தீவிரம் காட்டி வருகிறது.

ஏற்கனவே மார்ச் 7-ஆம் தேதி மாமல்லபுரத்தில் நடைபெற்ற மகளிர் தின விழாவில் பல்வேறு அதிரடி வாக்குறுதிகளை விஜய் அறிவித்துள்ள நிலையில், இந்த நேர்காணல் நிகழ்வு அக்கட்சித் தொண்டர்களிடையே பெரும் உற்சாகத்தை ஏற்படுத்தியுள்ளது.