தமிழகம் உள்ளிட்ட 5 மாநில சட்டசபை தேர்தல்: மார்ச் 15-ல் தேதி அறிவிக்கப்பட வாய்ப்பு!

தமிழகத்தில் ஆளும் கட்சியான திமுக அரசின் பதவிக்காலம் வரும் மே மாதம் 10-ம் தேதியுடன் நிறைவடைகிறது. இதேபோல் புதுச்சேரி (ஜூன் 15), மேற்கு வங்காளம் (மே 7), அசாம் (மே 20), மற்றும் கேரளா (மே 23) ஆகிய மாநிலங்களின் சட்டசபை பதவிக்காலமும் முடிவுக்கு வருகின்றன.

இதனை முன்னிட்டு, தமிழகத்தின் 234 தொகுதிகள் உட்பட 5 மாநிலங்களில் உள்ள மொத்தம் 824 சட்டசபை தொகுதிகளுக்கும் தேர்தலை நடத்த இந்திய தேர்தல் ஆணையம் விரிவான ஏற்பாடுகளைச் செய்து வருகிறது.

தேர்தல் ஏற்பாடுகள் குறித்து ஒவ்வொரு மாநிலத்தின் தலைமை தேர்தல் அதிகாரிகளுடனும் இந்திய தேர்தல் ஆணைய அதிகாரிகள் ஆலோசனைகளை மேற்கொண்டு வருகின்றனர். இதன் ஒரு பகுதியாக, கடந்த மாத இறுதியில் இந்திய தலைமை தேர்தல் ஆணையர் ஞானேஷ்குமார் சென்னை வருகை தந்தார். அவர், தமிழக தலைமை தேர்தல் அதிகாரி அர்ச்சனா பட்நாயக் மற்றும் அங்கீகரிக்கப்பட்ட அரசியல் கட்சிகளின் பிரதிநிதிகளுடன் விரிவான ஆலோசனை நடத்தினார்.

பிரதமர் நரேந்திர மோடி நாளை மறுநாள் (மார்ச் 11) திருச்சியில் நடைபெறும் தேசிய ஜனநாயகக் கூட்டணியின் பொதுக்கூட்டத்தில் பங்கேற்கிறார். அவர் டெல்லி திரும்பிய பிறகு, தேர்தல் தேதிக்கான இறுதி முடிவுகள் எடுக்கப்படும் என எதிர்பார்க்கப்படுகிறது.

அதன்படி, வரும் மார்ச் 15-ம் தேதி (ஞாயிற்றுக்கிழமை) இந்திய தலைமை தேர்தல் ஆணையர் ஞானேஷ்குமார், ஐந்து மாநிலங்களுக்கான தேர்தல் அட்டவணையை வெளியிடுவார் என்று தலைமைச் செயலக வட்டாரங்கள் தெரிவிக்கின்றன.

தமிழகத்தில் ஏப்ரல் மாதம் 23-ம் தேதி (வியாழக்கிழமை) ஒரே கட்டமாக வாக்குப்பதிவு நடைபெற அதிக வாய்ப்புள்ளதாகக் கூறப்படுகிறது. தேர்தல் தேதி அறிவிக்கப்பட்ட உடனேயே, தேர்தல் நடத்தை விதிமுறைகள் (Model Code of Conduct) உடனடியாக நடைமுறைக்கு வரும் என்பது குறிப்பிடத்தக்கது