தமிழ்நாடு மெர்க்கன்டைல் வங்கி நிகர லாபம் ரூ.1,337 கோடியாக உயர்வு : நிர்வாக இயக்குனர் தகவல்

தூத்துக்குடியை தலைமையிடமாகக் கொண்டு இயங்கி வரும் தமிழ்நாடு மெர்க்கன்டைல் வங்கி நிகர லாபம் ரூ.1,337 கோடியாக உயர்ந்துள்ளது. 

இந்தியாவின் பழமையான மற்றும் புகழ்பெற்ற தனியார் வங்கிகளில் ஒன்றான தமிழ்நாடு மெர்க்கன்டைல் வங்கி மார்ச் 31, 2026-டன் முடிவடைந்த நிதியாண்டில் லாபத்தில் பெரும் சாதனை படைத்துள்ளது.

இதுகுறித்து வங்கியின் நிர்வாக இயக்குனர் மற்றும் தலைமை நிர்வாக அதிகாரி சலி எஸ் நாயகர் வெளியிட்ட அறிக்கையின்படி,  வங்கியின் மொத்த வணிகம் ரூ.1,15,091 கோடியாக உயர்ந்து 17.37% வளர்ச்சியைப் பதிவு செய்துள்ளது.லாபம்: வங்கியின் நிகர லாபம் ரூ.1,337.55 கோடியாக அதிகரித்துள்ளது. இது கடந்த ஆண்டை விட 13.10% அதிகமாகும்.

வங்கியின் மொத்த வைப்புத் தொகைகள் 14.94% வளர்ச்சி பெற்று ரூ.61,712 கோடியாக உயர்ந்துள்ளது. வங்கியின் மொத்த கடன் (Advances) ரூ.53,379 கோடியாக உயர்ந்து 20.32% வளர்ச்சியை எட்டியுள்ளது. வங்கியின் வாராக் கடன் விகிதங்கள் (NPA) பெருமளவு குறைந்து, சொத்து தரம் வலுவடைந்துள்ளது.மொத்த வாராக் கடன் (Gross NPA) 1.25%-லிருந்து 0.73% ஆகக் குறைந்துள்ளது. நிகர வாராக் கடன் (Net NPA) 0.36%-லிருந்து 0.18% ஆகக் குறைந்துள்ளது.

கடந்த நிதியாண்டில் மட்டும் வங்கி 44 புதிய கிளைகளைத் தொடங்கியுள்ளது. இதன் மூலம் அகில இந்திய அளவில் வங்கியின் கிளைகளின் எண்ணிக்கை 622 ஆக உயர்ந்துள்ளது. வாடிக்கையாளர் சேவையை மேம்படுத்த AI (செயற்கை நுண்ணறிவு) அடிப்படையிலான கால் சென்டர், ஆரக்கிள் CX தளம் மற்றும் பாதுகாப்பான இணைய வங்கி வசதிகள் போன்ற பல்வேறு டிஜிட்டல் முன்னெடுப்புகளை வங்கி மேற்கொண்டுள்ளது.

வங்கியின் சிறப்பான செயல்பாட்டைக் கருத்தில் கொண்டு, 2025-26 நிதியாண்டிற்காக ஒவ்வொரு ரூ.10 முகவிலை கொண்ட பங்கிற்கும் ரூ.12.50 இறுதி லாபப்பங்கீடு (Dividend) வழங்க வங்கியின் இயக்குனர் குழு பரிந்துரை செய்துள்ளது. MSME மற்றும் சில்லறை வணிகப் பிரிவுகளில் வங்கி காட்டிய தீவிர கவனம் மற்றும் நிலையான வளர்ச்சி உத்தியே இந்த வெற்றிக்குக் காரணம் என்று வங்கியின் நிர்வாக இயக்குனர்தெரிவித்துள்ளார்.